दुर्मिळ आजाराने त्रस्त इक्बालसाठी अनंत अंबानींची मदत; विशेष उपचारांसाठी मुंबईत एअरलिफ्ट!

Image Source:(Internet)

मुंबई : पश्चिम बंगालच्या मुर्शिदाबाद जिल्ह्यातील एका अल्पवयीन मुलाच्या असामान्य वैद्यकीय स्थितीची सोशल मीडियावर चर्चा झाल्यानंतर त्याला मोठी वैद्यकीय मदत मिळाली आहे. बेलडांगा येथील इक्बाल नावाच्या या मुलाला गंभीर त्रासामुळे बराच काळ तलावाच्या पाण्यात राहावे लागत होते. त्याची अवस्था समोर आल्यानंतर अनंत अंबानी यांनी मदतीचा हात पुढे केला. त्यांच्या पुढाकारातून इक्बालला विशेष उपचारांसाठी विमानाने मुंबईत आणण्यात आले आहे.

इक्बालला पाण्याबाहेर आल्यानंतर शरीरावर तीव्र जळजळ आणि दाह जाणवत असल्याचे सांगितले जाते. त्यामुळे तो दिवसाचा मोठा वेळ तलावातच घालवत होता. त्याच्या या अवस्थेचा व्हिडिओ सोशल मीडियावर व्हायरल झाल्यानंतर प्रकरणाने सर्वांचे लक्ष वेधून घेतले.

व्हिडिओ व्हायरल झाल्यानंतर वैद्यकीय मदत-
इक्बालचा व्हिडिओ समोर आल्यानंतर वैद्यकीय तज्ज्ञांच्या एका पथकाने त्याच्या प्रकृतीबाबत माहिती घेतली. त्यानंतर त्याला अधिक चांगल्या वैद्यकीय सुविधांची आवश्यकता असल्याचे लक्षात आले. अनंत अंबानी यांच्या सूचनेनुसार इक्बालला तातडीने मुंबईत आणण्याची व्यवस्था करण्यात आली.

सध्या इक्बालला रिलायन्स फाऊंडेशन हॉस्पिटलमध्ये दाखल करण्यात आले असून, डॉक्टरांच्या देखरेखीखाली त्याच्या विविध वैद्यकीय तपासण्या आणि उपचार सुरू आहेत.

पाण्यातच खाणे-पिणे, दिवस-रात्र तलावात वास्तव्य-
स्थानिक नागरिकांच्या म्हणण्यानुसार, इक्बाल सकाळपासून रात्रीपर्यंत तलावाच्या पाण्यात असल्याचे अनेकदा दिसत असे. तो पाण्यातच अन्न खात आणि पाणी पीत असल्याचेही सांगण्यात आले. काही वेळा तो एका जलसाठ्यातून दुसऱ्या ठिकाणी जात असल्याचे स्थानिकांनी पाहिले होते.

मुलाच्या प्रकृतीत सुधारणा व्हावी यासाठी त्याच्या कुटुंबीयांनी यापूर्वी स्थानिक रुग्णालयांमध्ये उपचार घेतले होते. मात्र अपेक्षित परिणाम न झाल्याने आणि पुढील उपचारांचा खर्च परवडत नसल्याने कुटुंबीयांसमोर मोठे संकट निर्माण झाले होते.

सतत पाण्यात राहणे ठरू शकते धोकादायक-
इक्बालच्या उपचारादरम्यान डॉक्टरांनी दीर्घकाळ पाण्यात राहण्याच्या परिणामांबाबतही सावध केले आहे. त्वचा सतत ओलसर राहिल्यास मॅसरेशन होऊ शकते. यामुळे त्वचा मऊ होऊन त्यावर भेगा पडणे, जळजळ होणे तसेच संसर्ग होण्याची शक्यता वाढते.

तज्ज्ञांच्या मते, सततच्या ओलाव्यामुळे बुरशीजन्य आणि जिवाणू संसर्गाचा धोकाही निर्माण होऊ शकतो. त्यामुळे अशा प्रकारची लक्षणे दिसणाऱ्या रुग्णांनी घरगुती उपायांवर अवलंबून न राहता तातडीने तज्ज्ञ डॉक्टरांचा सल्ला घेणे आवश्यक आहे.

इक्बालच्या प्रकरणात आता मुंबईतील तज्ज्ञ डॉक्टरांकडून त्याची सविस्तर तपासणी केली जात असून, त्याच्या या असामान्य त्रासामागील नेमके वैद्यकीय कारण शोधण्याचे प्रयत्न सुरू आहेत.