नागपुरात प्रेमसंबंधाच्या वादातून युवकाची हत्या; यशोधरा नगरात मध्यरात्री रक्तरंजित संघर्ष

Image Source:(Internet)

नागपूर : शहरातील वाढत्या गुन्हेगारीच्या पार्श्वभूमीवर यशोधरा नगर परिसर पुन्हा एकदा खूनाच्या घटनेने हादरला आहे. प्रेमसंबंधातून सुरू झालेला वाद मध्यरात्रीच्या सुमारास हिंसक वळणावर पोहोचला आणि त्यात एका युवकाचा मृत्यू झाला. या घटनेमुळे संघर्ष नगर परिसरात खळबळ उडाली असून नागरिकांमध्ये भीतीचे वातावरण निर्माण झाले आहे.

मृत युवकाची ओळख सलमान अशफाक अन्सारी (रा. संघर्ष नगर) अशी झाली आहे. पोलिसांकडून मिळालेल्या माहितीनुसार, सलमानचे एका तरुणीसोबत प्रेमसंबंध होते. याच कारणावरून त्याचा स्थानिक युवक मुजम्मिल याच्याशी काही दिवसांपासून वाद सुरू होता.

मंगळवारी मध्यरात्री संघर्ष नगर येथील टिपू सुलतान चौकात दोघे समोरासमोर आले. सुरुवातीला झालेला शाब्दिक वाद काही क्षणांतच हाणामारीत बदलला. चौकातील पानटपरीजवळ दोघांमध्ये जोरदार झटापट झाली. या हल्ल्यात सलमान गंभीर जखमी झाला.

स्थानिक नागरिकांनी जखमी सलमानला तातडीने मेयो रुग्णालयात दाखल केले. मात्र उपचार सुरू असतानाच डॉक्टरांनी त्याला मृत घोषित केले. घटनेची माहिती मिळताच परिसरात मोठी गर्दी झाली. संभाव्य तणाव लक्षात घेऊन पोलिसांनी अतिरिक्त बंदोबस्त तैनात केला.

सूत्रांच्या माहितीनुसार, आरोपी मुजम्मिल याच्याविरोधात यापूर्वीही काही गुन्हे दाखल असल्याची चर्चा आहे. घटनेनंतर तो फरार झाला असून पोलिसांचे विशेष पथक त्याचा शोध घेत आहे. उशिरापर्यंत खुनाचा गुन्हा नोंदविण्याची प्रक्रिया सुरू होती.

वाढत्या गुन्हेगारीने नागरिक चिंतेत-
नागपूर शहरात सातत्याने समोर येणाऱ्या खून, हाणामारी आणि गंभीर गुन्ह्यांच्या घटनांमुळे नागरिकांमध्ये असुरक्षिततेची भावना वाढीस लागली आहे. किरकोळ कारणांवरून होणारे वाद थेट जीवघेण्या हल्ल्यांपर्यंत पोहोचत असल्याने कायदा-सुव्यवस्थेवर प्रश्नचिन्ह उपस्थित केले जात आहे.

पोलिसांचा तपास सुरू-
यशोधरा नगर पोलिसांनी या प्रकरणाचा तपास सुरू केला असून प्रेमसंबंध, जुनी वैमनस्यता आणि इतर संभाव्य कारणांच्या अनुषंगाने चौकशी केली जात आहे. खुनामागील नेमके कारण तपास पूर्ण झाल्यानंतरच स्पष्ट होणार असल्याची माहिती पोलिसांनी दिली.