महाराष्ट्र विधान परिषद निवडणुकांचा बिगुल; १६ जागांसाठी १८ जूनला मतदान

Image Source:(Internet)

मुंबई/नागपूर : महाराष्ट्र विधान परिषदेतील स्थानिक स्वराज्य संस्था मतदारसंघांच्या १६ जागांसाठी निवडणूक आयोगाने निवडणुकीचा कार्यक्रम जाहीर केला आहे. या जागांसाठी १८ जून २०२६ रोजी मतदान होणार असून २२ जूनला निकाल जाहीर केला जाणार आहे. यासोबतच नागपूर स्थानिक स्वराज्य संस्था मतदारसंघाच्या पोटनिवडणुकीचीही घोषणा करण्यात आल्याने राज्यातील राजकीय हालचालींना वेग आला आहे.

राज्यातील अनेक सदस्यांचा कार्यकाळ पूर्ण झाल्याने या निवडणुका होत आहेत. काही जागा मागील काही काळापासून रिक्त असल्याने या निवडणुकांकडे सर्वच राजकीय पक्षांचे विशेष लक्ष लागले आहे. आगामी काळात उमेदवारी, आघाड्या आणि स्थानिक पातळीवरील राजकीय समीकरणांमुळे वातावरण अधिक रंगण्याची शक्यता व्यक्त होत आहे.

भाजप नेते चंद्रशेखर बावनकुळे विधानसभा सदस्य म्हणून निवडून आल्यानंतर नागपूर विधान परिषद जागा रिक्त झाली होती. आता या जागेसाठी होणारी पोटनिवडणूक प्रतिष्ठेची मानली जात आहे. विदर्भाच्या राजकारणात नागपूरचे महत्त्व लक्षात घेता भाजप, काँग्रेससह इतर पक्षांनीही रणनीती आखण्यास सुरुवात केली आहे. स्थानिक स्वराज्य संस्थांमधील मतांच्या गणितामुळे ही लढत चुरशीची होण्याचे संकेत आहेत.

निवडणूक आयोगाने जाहीर केलेल्या कार्यक्रमानुसार २५ मे रोजी अधिसूचना प्रसिद्ध होणार आहे. उमेदवारी अर्ज दाखल करण्याची अंतिम तारीख १ जून असून २ जूनला अर्जांची छाननी केली जाणार आहे. ४ जूनपर्यंत उमेदवारी अर्ज मागे घेता येणार असून १८ जूनला मतदान पार पडेल. त्यानंतर २२ जूनला मतमोजणी होऊन निकाल जाहीर केले जातील. संपूर्ण निवडणूक प्रक्रिया २५ जूनपर्यंत पूर्ण होणार आहे.

स्थानिक स्वराज्य संस्था मतदारसंघातील पोटनिवडणूक घेण्यासाठी संबंधित मतदारसंघात किमान ७५ टक्के संस्था आणि प्रतिनिधी कार्यरत असणे आवश्यक असते. ही अट पूर्ण झाल्यानंतरच निवडणूक आयोगाने नागपूर पोटनिवडणुकीला मंजुरी दिली आहे. दरम्यान, विधान परिषद निवडणुकांच्या पार्श्वभूमीवर राज्यातील राजकीय वातावरण चांगलेच तापले असून नागपूरच्या लढतीकडे विशेष लक्ष लागले आहे.