मोदींच्या आवाहनानंतर केंद्राचा मोठा निर्णय; सोन्यावरील आयात शुल्क वाढताच दरांनी गाठला विक्रमी टप्पा!

Image Source:(Internet)

नवी दिल्ली : वाढत्या जागतिक आर्थिक तणावाच्या पार्श्वभूमीवर केंद्र सरकारने सोन्याच्या आयात शुल्कात मोठी वाढ करण्याचा निर्णय घेतला आहे. पंतप्रधान Narendra Modi यांनी नागरिकांना अनावश्यक सोने खरेदी टाळण्याचे आवाहन केल्यानंतर सरकारने हे कठोर पाऊल उचलले आहे. या निर्णयानंतर देशातील सराफा बाजारात सोने आणि चांदीच्या दरांनी ऐतिहासिक उच्चांक गाठला आहे.

सोन्यावरील आयात शुल्क थेट १५ टक्क्यांवर-
देशाच्या परकीय चलन साठ्यावर वाढत असलेला ताण कमी करण्यासाठी केंद्र सरकारने सोन्याच्या आयातीवर मोठा आर्थिक भार टाकण्याचा निर्णय घेतला आहे. याआधी सोन्यावर ६ टक्के आयात शुल्क आकारले जात होते. मात्र, आता ते वाढवून थेट १५ टक्के करण्यात आले आहे.

सरकारच्या या निर्णयामुळे परदेशातून होणारी सोन्याची आयात कमी होईल आणि देशातील नागरिक सोन्याच्या खरेदीपासून काही प्रमाणात दूर राहतील, अशी अपेक्षा व्यक्त केली जात आहे.

सोन्या-चांदीच्या दरात मोठी उसळी-
आयात शुल्क वाढीची घोषणा होताच मल्टी कमोडिटी एक्सचेंजमध्ये (MCX) सोन्या-चांदीच्या किमतींमध्ये प्रचंड वाढ नोंदवली गेली.

सोने : प्रति १० ग्रॅम सोन्यामागे तब्बल ९ हजार रुपयांची वाढ झाली असून, दर १,६२,६४८ रुपयांवर पोहोचले आहेत.
चांदी : प्रति किलो चांदीच्या दरात १६ हजार रुपयांची वाढ झाली असून, चांदी २,६५,८०५ रुपये प्रति किलो दराने विकली जात आहे.

जागतिक बाजारपेठेतही सोन्याच्या किमतींमध्ये वाढ दिसून आली असून, आंतरराष्ट्रीय स्तरावरही मौल्यवान धातूंना मोठी मागणी वाढल्याचे चित्र आहे.

सरकारचा ‘गोल्ड कंट्रोल’चा प्रयत्न?
सोन्याच्या वाढत्या आयातीमुळे देशातून मोठ्या प्रमाणावर परकीय चलन बाहेर जात असल्याची चिंता केंद्र सरकारला आहे. त्यामुळेच पंतप्रधान मोदी यांनी नागरिकांना सोने खरेदी टाळण्याचे आवाहन केले होते. त्यानंतर आता आयात शुल्क वाढवून सरकारने थेट आर्थिक पातळीवर नियंत्रण आणण्याचा प्रयत्न सुरू केला आहे.

सूत्रांच्या माहितीनुसार, आगामी काळात सोने खरेदी आणि आयातीसंदर्भात आणखी कडक नियम लागू होण्याची शक्यता नाकारता येत नाही. त्यामुळे सराफा बाजारासह सर्वसामान्य ग्राहकांमध्येही चिंता वाढली आहे.