पंजाब विधानसभा गोंधळात;मुख्यमंत्री भगवंत मान यांच्या ‘अल्कोहोल टेस्ट’च्या मागणीवरून खडाजंगी

 

 Image Source:(Internet)

 

चंदीगड : पंजाब (Punjab) विधानसभेत शुक्रवारी मोठा राजकीय गोंधळ उडाला. मुख्यमंत्री भगवंत मान यांच्या ‘अल्कोहोल टेस्ट’ची मागणी विरोधकांनी केल्याने सत्ताधारी आणि विरोधक आमनेसामने आले. आम आदमी पक्ष आणि काँग्रेस आमदारांमधील तीव्र वादामुळे सभागृहाची कामकाज वारंवार ठप्प झाली आणि अखेर स्थगित करावी लागली.

 

दुपारच्या विश्रांतीनंतर सभागृह सुरू होताच काँग्रेस आमदारांनी मुख्यमंत्र्यांवर आरोप करत तात्काळ ब्रेथ अॅनालायझर चाचणीची मागणी केली. या मागणीवर सत्ताधारी आमदारांनी जोरदार आक्षेप घेत घोषणाबाजी सुरू केली, त्यामुळे वातावरण अधिकच तापले.

 

सभापती कुलतार सिंह संधावन यांनी विरोधकांची मागणी फेटाळून लावत संपूर्ण सभागृहाचा ‘डोप टेस्ट’ करण्याची सूचनाही नाकारली.

 

विरोधी पक्षनेते प्रताप सिंह बाजवा यांनी सभापतींना पत्र लिहून या घटनेला “गंभीर आणि चिंताजनक” असे संबोधले. त्यांनी सर्व आमदारांची कोणताही अपवाद न ठेवता तपासणी करण्याची मागणी केली.

 

दरम्यान, आम आदमी पक्षाकडून हे सर्व आरोप फेटाळण्यात आले. पक्षाचे नेते अमन अरोरा यांनी काँग्रेसवर राजकारण करत असल्याचा आरोप केला आणि हे विधानसभेच्या प्रतिष्ठेला धक्का देणारे असल्याचे म्हटले.

 

या प्रकरणात राज्यसभा खासदार स्वाती मालीवाल यांनीही मुख्यमंत्र्यांवर गंभीर आरोप केले, तर शिरोमणी अकाली दलचे नेते सुखबीर सिंह बादल यांनी याला “लोकशाहीच्या मंदिराचा अपमान” असे संबोधले.

 

सभागृहात या दरम्यान मुख्यमंत्री मान आणि काँग्रेस आमदार सुखपाल सिंह खैरा यांच्यात जोरदार शाब्दिक चकमक झाली. मोबाईल वापराच्या मुद्द्यावरून दोघांमध्ये आरोप-प्रत्यारोप झाले आणि वातावरण अधिक तणावपूर्ण बनले. परिस्थिती नियंत्रणात आणण्यासाठी सभापतींना वारंवार हस्तक्षेप करावा लागला.

 

या सर्व गोंधळात मुख्यमंत्री मान यांच्या सरकारकडून विश्वासदर्शक ठरावही मांडण्यात आला, ज्यामुळे राज्यातील राजकीय वातावरण आणखी तापले आहे.