कान्हानमध्ये अमली पदार्थविरोधी मोठी कारवाई; ५.८७ किलो गांजासह दोघे जेरबंद

Image Source:(Internet)

नागपूर : जिल्ह्यातील कान्हान परिसरात पोलिसांनी केलेल्या धडक कारवाईत अमली पदार्थांची विक्री करणाऱ्या दोन जणांना अटक करण्यात आली आहे. शुक्रवारी सापळा रचून ही कारवाई करण्यात आली असून, आरोपींकडून ५.८७ किलो गांजा आणि एक दुचाकी असा मिळून सुमारे १.९७ लाख रुपयांचा मुद्देमाल जप्त करण्यात आला आहे.

अटक केलेल्या आरोपींमध्ये नितेश उर्फ बिट्टू रमेश भुते (२८, रा. महाजन नगर, टेकडी, पारशिवनी) आणि शैलेश बंसीलाल अकोने (४०, रा. पिपरी कान्हान, पारशिवनी) यांचा समावेश आहे. हे दोघे कान्हान परिसरात गांजाची विक्री करत असल्याची गुप्त माहिती पोलिसांना मिळाली होती.

या माहितीनुसार पोलिसांनी नियोजनबद्ध पद्धतीने सापळा रचत दोघांना ताब्यात घेतले. झडतीदरम्यान त्यांच्या जवळून मोठ्या प्रमाणात गांजा तसेच वापरात असलेली दुचाकी जप्त करण्यात आली.

दरम्यान, या प्रकरणाचा अधिक तपास सुरू असून, या अवैध धंद्यामागे आणखी कोणी सहभागी आहे का, याचा शोध पोलिसांकडून घेतला जात आहे.