नागपूर रेल्वे स्थानकावर आरपीएफची कारवाई; 3.72 लाखांचा गांजा जप्त, एक जण अटकेत

 

 Image Source:(Internet)

नागपूर (Nagpur) रेल्वे स्थानकावर रेल्वे सुरक्षा दलाने (आरपीएफ) अंमली पदार्थांच्या तस्करीविरोधात मोठी कारवाई केली आहे. या कारवाईत एका संशयित व्यक्तीला ताब्यात घेण्यात आले असून त्याच्याकडून सुमारे 3.72 लाख रुपये किमतीचा गांजा जप्त करण्यात आला आहे.

 

मिळालेल्या माहितीनुसार, 6 फेब्रुवारी 2026 रोजी आरपीएफचे पथक स्थानक परिसरात नियमित गस्त घालत असताना दोन बॅगा घेऊन फिरणाऱ्या एका व्यक्तीच्या हालचाली संशयास्पद वाटल्या. त्यामुळे पोलिसांनी त्याला थांबवून चौकशी केली. या कारवाईत एका निरीक्षकासह एक सहाय्यक उपनिरीक्षक (एएसआय) आणि दोन जवान सहभागी होते.

 

साक्षीदारांच्या उपस्थितीत दोन्ही बॅगांची तपासणी करण्यात आली. तपासणीदरम्यान बॅगांमधून 24.80 किलो वजनाचे गांजाचे 9 पॅकेट आढळून आले. जप्त केलेल्या गांजाची अंदाजे बाजारभावानुसार किंमत 3.72 लाख रुपये असल्याची माहिती अधिकाऱ्यांनी दिली.

 

चौकशीत आरोपीची ओळख मध्य प्रदेशातील भिंड जिल्ह्यातील रहिवासी शाहिद खान अशी झाली. त्याने हा गांजा ग्वाल्हेरकडे घेऊन जाण्याचा प्रयत्न करत असल्याची कबुली दिली आहे.

 

आरपीएफने आरोपीला अटक करून जप्त केलेल्या अंमली पदार्थांसह पुढील कारवाईसाठी नागपूर येथील गव्हर्नमेंट रेल्वे पोलिसांकडे (जीआरपी) सुपूर्द केले आहे. या प्रकरणाचा पुढील तपास सुरू असल्याची माहिती पोलिसांनी दिली.