आरटीई प्रवेशाबाबत उच्च न्यायालयाचा मोठा निर्णय; अर्जासाठी मुदतवाढ, १ किलोमीटरची अट स्थगित

 

 Image Source:(Internet)

नागपूर :

शिक्षण हक्क कायद्यांतर्गत आरटीईच्या (RTE) २५ टक्के राखीव जागांसाठी प्रवेश प्रक्रियेची वाट पाहणाऱ्या राज्यातील हजारो पालकांना मोठा दिलासा मिळाला आहे. या संदर्भातील याचिकेवर सुनावणी करताना मुंबई उच्च न्यायालयाच्या नागपूर खंडपीठाने महत्त्वपूर्ण आदेश देत अर्ज करण्याची अंतिम मुदत तीन दिवसांनी वाढवण्याचे निर्देश दिले आहेत.

 

शंकर बाबुराव आत्राम यांनी दाखल केलेल्या याचिकेवर सुनावणीदरम्यान न्यायालयाने राज्य सरकारने १२ फेब्रुवारी २०२६ रोजी काढलेल्या शासन निर्णयातील काही अटींवर आक्षेप नोंदवला. विशेषतः पालकांना त्यांच्या घरापासून केवळ १ किलोमीटर परिसरातील शाळांमध्येच अर्ज करण्याची मर्यादा घालण्यात आली होती. या अटीमुळे अनेक विद्यार्थ्यांना इच्छित शाळांमध्ये प्रवेश घेणे कठीण होत असल्याची बाब न्यायालयाच्या निदर्शनास आणून देण्यात आली.

 

या पार्श्वभूमीवर न्यायालयाने या अटीवर तात्पुरती स्थगिती देत पालकांना मोठा दिलासा दिला आहे. न्यायालयाने नमूद केले की अशा मर्यादा शिक्षणाच्या अधिकाराशी संबंधित घटनात्मक तरतुदींशी विसंगत ठरू शकतात. त्यामुळे या धोरणाचा पुनर्विचार करण्याची आवश्यकता असल्याचेही निरीक्षण न्यायालयाने नोंदवले.

 

या प्रकरणाची सुनावणी न्यायमूर्ती अनिल किल्लोर आणि न्यायमूर्ती राज वाकोडे यांच्या खंडपीठासमोर झाली. सुनावणीनंतर न्यायालयाने आरटीई प्रवेशासाठी अर्ज करण्याची अंतिम तारीख तीन दिवसांनी वाढवण्याचे आदेश दिले. पूर्वी अर्जाची अंतिम मुदत १० मार्च निश्चित करण्यात आली होती. मात्र ऑनलाइन प्रणालीतील बदल आणि काही पालकांना अर्ज प्रक्रियेची माहिती न मिळाल्यामुळे त्यांना अतिरिक्त वेळ देण्याची गरज असल्याचे न्यायालयाने स्पष्ट केले.

 

तसेच विद्यार्थ्यांना आता त्यांच्या निवासस्थानापासून तीन किलोमीटरपर्यंतच्या परिसरातील शाळांमध्ये प्रवेशासाठी अर्ज करण्याची मुभा देण्यात आली आहे. न्यायालयाच्या या निर्णयामुळे राज्यातील अनेक पालकांना आपल्या मुलांना पसंतीच्या शाळेत प्रवेशासाठी अर्ज करण्याची संधी मिळणार आहे.