भाजपाविरोधात ब्राह्मण समाज नाराज; मायावतींचा केंद्र व राज्य सरकारवर जोरदार हल्ला

 

 Image Source:(Internet)

बहुजन समाज पार्टीच्या (बसपा) राष्ट्रीय अध्यक्षा आणि उत्तर प्रदेशच्या माजी मुख्यमंत्री मायावती (Mayawati) यांनी सत्ताधारी भाजपावर तीव्र शब्दांत टीका केली आहे. सध्याच्या सरकारमध्ये काही मोजक्या लोकांव्यतिरिक्त समाजातील बहुतांश घटक स्वतःला दुर्लक्षित आणि त्रस्त मानत असल्याचा आरोप त्यांनी केला. विशेषतः ब्राह्मण समाज आपल्या अवहेलना व अपमानाविरोधात आता उघडपणे आवाज उठवत असल्याचे त्या म्हणाल्या.

 

शनिवारी लखनऊ येथे बसपाच्या महत्त्वाच्या बैठकीत प्रदेश, मंडळ, जिल्हा व विधानसभा स्तरावरील पदाधिकाऱ्यांसोबत आगामी विधानसभा निवडणुकीच्या दृष्टीने सखोल चर्चा करण्यात आली. बैठकीनंतर माध्यमांशी बोलताना मायावती म्हणाल्या की, भाजपाच्या धोरणांमुळे जनतेत तीव्र असंतोष आहे आणि हीच नाराजी विविध समाजघटकांमध्ये स्पष्टपणे दिसून येत आहे.

 

ब्राह्मण समाजातील वाढती नाराजी आता राष्ट्रीय चर्चेचा विषय ठरल्याने भाजप नेतृत्व अस्वस्थ झाल्याचेही त्यांनी नमूद केले. बसपाच्या सत्ताकाळात ब्राह्मण समाजाला सन्मान, सुरक्षा आणि जबाबदारीची पदे देण्यात आली होती; असा सन्मान इतर कोणत्याही सरकारने दिला आहे का, असा सवाल त्यांनी उपस्थित केला.

 

मायावती यांनी स्पष्ट केले की बसपाची भूमिका नेहमीच “सर्वजन हिताय, सर्वजन सुखाय” या तत्वावर आधारित राहिली आहे. बसपा सरकारच्या काळात कायद्याचे काटेकोर पालन करत कायद्याचे राज्य प्रस्थापित करण्यात आले, ज्याचा लाभ सर्व समाजघटकांना मिळाला, असे त्या म्हणाल्या.

 

इतर राजकीय पक्षांवर टीका करताना त्यांनी त्यांची धोरणे जातीय आणि भांडवलदारांच्या हितसंबंधांना पूरक असल्याचा आरोप केला. यामुळे गरीब, वंचित, अनुसूचित जाती-जमाती व मागासवर्गीयांना मोठा फटका बसत असल्याचे त्यांनी सांगितले. आरक्षणाबाबत विरोधी पक्षांची भूमिका देखील या वर्गांसाठी अडचणीची ठरत असल्याचे मायावती म्हणाल्या.

 

भाजपावर निशाणा साधताना त्यांनी विद्यापीठ अनुदान आयोगाच्या (UGC) अलीकडील नियमांवर टीका केली. हे नियम सामाजिक समरसता वाढवण्याऐवजी सामाजिक तणाव निर्माण करत असल्याचा आरोप त्यांनी केला.

 

राज्यात सुरू असलेल्या विशेष गहन पुनरीक्षण (SIR) प्रक्रियेबाबत मायावती यांनी मतदार नोंदणीची प्रक्रिया अधिक सुलभ व संवेदनशील करण्याची मागणी केली. गरीब, मजूर, महिला, रोजंदारीवर काम करणारे आणि अशिक्षित नागरिक मतदार होण्यापासून वंचित राहू नयेत, अशी त्यांनी अधिकाऱ्यांना सूचना केली.

 

संसदेच्या अर्थसंकल्पीय अधिवेशनावर भाष्य करताना सत्ताधारी आणि विरोधकांतील सततच्या संघर्षामुळे जनहिताच्या मुद्द्यांवर अर्थपूर्ण चर्चा होत नसल्याची खंत त्यांनी व्यक्त केली.

 

अखेरीस, विधानसभा निवडणूक 2027 लक्षात घेऊन संघटनात्मक बदल करण्यात आल्याचे सांगत मायावती म्हणाल्या की, मिशन-2027 हे मिशन-2007 प्रमाणे यशस्वी करून उत्तर प्रदेशात पुन्हा एकदा पूर्ण बहुमताचे बसपा सरकार स्थापन करण्याचा निर्धार पक्षाने केला आहे.