सांगलीतलं असं एक गाव जिथं एकही मत नाही; काय आहे नेमकं प्रकरण?

 

 Image Source:(Internet)

सांगली (Sangli) जिल्ह्यात जिल्हा परिषद आणि पंचायत समिती निवडणुकांसाठी मतदानाचा उत्साह शिगेला असताना, तासगाव तालुक्यातील बलगवडे गावाने मात्र लोकशाहीच्या या प्रक्रियेला जाणीवपूर्वक दूर ठेवत प्रशासनाचं लक्ष वेधलं आहे. गावात उभारण्यात येत असलेल्या सौर ऊर्जा प्रकल्पासाठी झालेल्या मोठ्या प्रमाणावरील वृक्षतोडीच्या निषेधार्थ ग्रामस्थांनी संपूर्ण मतदानावर बहिष्कार टाकला आहे.

 

बलगवडे गावाच्या गायरान जमिनीवर राज्य सरकारच्या माध्यमातून सौर ऊर्जा प्रकल्प उभारण्याचं काम सुरू आहे. मात्र, या प्रकल्पासाठी कोणतीही पूर्वसूचना न देता गावकऱ्यांनी वर्षानुवर्षे जपलेली आणि लावलेली साडेबारा हजारांहून अधिक झाडं तोडण्यात आली, असा गंभीर आरोप ग्रामस्थांनी केला आहे. या वृक्षतोडीमुळे गावाच्या पर्यावरणाला मोठा फटका बसल्याची भावना नागरिकांमध्ये तीव्र आहे.

 

बलगवडे गावाची एकूण मतदारसंख्या सुमारे २३०० असून प्रशासनाने दोन मतदान केंद्रांची व्यवस्था केली होती. मात्र सकाळपासून दुपारपर्यंत एकही मतदार मतदानासाठी पुढे आला नाही. मतदान केंद्रांवर केवळ निवडणूक अधिकारी आणि पोलीस कर्मचारी उपस्थित होते. गावकऱ्यांनी बंद पाळत आपली ठाम भूमिका मांडल्याने संपूर्ण जिल्ह्यात या घटनेची चर्चा सुरू झाली आहे.

 

“आम्ही पर्यावरण संवर्धनासाठी झाडं लावली, पण सरकारनेच ती तोडली. त्यामुळे हा सौर ऊर्जा प्रकल्प गावातून हटवून अन्यत्र हलवावा,” अशी ठाम मागणी ग्रामस्थांनी केली आहे. मागणी मान्य होईपर्यंत निवडणूक प्रक्रियेत सहभागी होणार नसल्याचंही त्यांनी स्पष्ट केलं आहे.

 

एकीकडे शासन वृक्षारोपणाचा संदेश देत असताना, दुसरीकडे सरकारी प्रकल्पासाठीच मोठ्या प्रमाणावर वृक्षतोड होत असल्याने प्रशासकीय धोरणांवर गंभीर प्रश्नचिन्ह उपस्थित झालं आहे. बलगवडे ग्रामस्थांचा हा बहिष्कार आता पर्यावरण आणि विकास यामधील संघर्षाचं जिवंत उदाहरण ठरत आहे.