जालंधरमध्ये थरार; आपच्या पदाधिकाऱ्याचा गोळीबारात मृत्यू, शहरात भीतीचे वातावरण

 

Image Source:(Internet) 

पंजाबच्या जालंधर (Jalandhar) शहरात शुक्रवारी पहाटे घडलेल्या एका धक्कादायक घटनेने राजकीय वर्तुळासह सर्वसामान्य नागरिकांमध्ये खळबळ उडाली आहे. आम आदमी पार्टीचे पदाधिकारी लकी ओबेरॉय यांच्यावर अज्ञात व्यक्तींनी गोळीबार केला. उपचारादरम्यान त्यांचा मृत्यू झाल्याने संपूर्ण शहरात तणावाचे वातावरण निर्माण झाले आहे.

 

मॉडेल टाऊन परिसरात गुरुद्वाराबाहेर ही घटना घडली. लकी ओबेरॉय हे आपल्या थार वाहनात बसलेले असताना अचानक हल्लेखोरांनी त्यांच्यावर गोळ्या झाडल्या. एकूण १६ फायर करण्यात आले असून त्यातील काही गोळ्या थेट ओबेरॉय यांना लागल्या. अचानक झालेल्या गोळीबारामुळे परिसरात गोंधळ उडाला. नागरिकांनी जीव वाचवण्यासाठी पळ काढला, तर अनेक व्यापाऱ्यांनी तातडीने दुकाने बंद केली.

 

हल्ल्यानंतर आरोपी मोटारसायकलवरून घटनास्थळावरून फरार झाले. गंभीर जखमी अवस्थेत ओबेरॉय यांना प्रथम शासकीय रुग्णालयात नेण्यात आले, मात्र प्रकृती खालावल्याने त्यांना खासगी रुग्णालयात हलवण्यात आले. तेथे डॉक्टरांनी त्यांना मृत घोषित केले.

 

घटनेची माहिती मिळताच पोलिसांचे वरिष्ठ अधिकारी घटनास्थळी दाखल झाले. संपूर्ण परिसर सील करण्यात आला असून घटनास्थळावरून रिकाम्या काडतुसांची जप्ती करण्यात आली आहे. हल्लेखोरांचा माग काढण्यासाठी सीसीटीव्ही फुटेज तपासले जात असून तपास यंत्रणा सर्व शक्य बाजूंनी चौकशी करत आहेत.

 

या घटनेनंतर जालंधरमध्ये तणाव निर्माण झाला असून अतिरिक्त पोलीस बंदोबस्त लावण्यात आला आहे. आम आदमी पार्टीच्या नेत्यांनी या हत्येचा तीव्र निषेध करत दोषींना लवकरात लवकर अटक करण्याची मागणी केली आहे.

 

पोलिसांच्या प्राथमिक अंदाजानुसार हा हल्ला वैयक्तिक वाद किंवा राजकीय कारणांमुळे झाला असण्याची शक्यता आहे. लकी ओबेरॉय हे जालंधर कॅन्टचे प्रभारी राजविंदर कौर थियाडा यांचे जवळचे सहकारी होते. या हत्येमागील नेमके कारण शोधण्यासाठी तपास सुरू असून, पुढील काही तासांत महत्त्वाचे धागेदोरे हाती लागण्याची शक्यता पोलिसांनी व्यक्त केली आहे.