नागपूर ग्रामीण पोलिसांची धडक कारवाई; १२.६८ किलो गांजा जप्त, आरोपी जेरबंद

 

 Image Source:(Internet)

अमली पदार्थांविरोधात मोहीम राबवत नागपूर ग्रामीण पोलिस (Nagpur Rural Police) यांनी मोठी कारवाई करत सुमारे १२.६८ किलो गांजा हस्तगत केला आहे. या प्रकरणात एका संशयिताला अटक करण्यात आली असून जप्त मुद्देमालाची एकूण किंमत ४ लाख १४ हजार ६०० रुपये इतकी असल्याची माहिती पोलिसांकडून देण्यात आली.

 

२४ फेब्रुवारी रोजी कुही पोलिस स्टेशन हद्दीत अमली पदार्थविरोधी पथकाला नागपूर–उमरेड मार्गावरून गांजाची अवैध वाहतूक होत असल्याची गुप्त माहिती मिळाली होती. त्यानुसार पोलिसांनी सापळा रचून परिसरात गस्त वाढवली.

 

दरम्यान, क्रमांक नसलेल्या दुचाकीवरून लाल रंगाची मोठी बॅग घेऊन जाणाऱ्या एका व्यक्तीवर पोलिसांचा संशय गेला. त्याला अडवण्याचा प्रयत्न करताच त्याने पळण्याचा प्रयत्न केला. मात्र पोलिसांनी तत्काळ पाठलाग करून त्याला पकडले.

 

आकाश युवराज पांचबई (वय ३०, रा. पिंपळगाव निपाणी, ता. पातूर) असे अटक करण्यात आलेल्या आरोपीचे नाव आहे. त्याच्या ताब्यातील बॅगची झडती घेतली असता त्यामध्ये १२.६८ किलो गांजा आढळून आला. चौकशीत हा माल वितरणासाठी नेत असल्याची कबुली त्याने दिल्याचे पोलिसांनी सांगितले.

 

या कारवाईत गांजासह वाहतुकीसाठी वापरलेली दुचाकी आणि एक मोबाईल फोन जप्त करण्यात आला आहे. जप्त मालाची एकत्रित किंमत ४ लाख १४ हजार ६०० रुपये इतकी आहे.

 

या प्रकरणी आरोपीविरुद्ध Narcotic Drugs and Psychotropic Substances Act अंतर्गत कलम २०(ब) व २२ प्रमाणे गुन्हा दाखल करण्यात आला असून पुढील तपास सुरू आहे. या प्रकरणातून अमली पदार्थांच्या पुरवठा साखळीबाबत अधिक माहिती समोर येण्याची शक्यता व्यक्त केली जात आहे.