शरद पवारांच्या प्रकृतीबाबत दिलासा देणारी बातमी; पुढील ४८ तासांत डिस्चार्जची शक्यता

 

 Image Source:(Internet)

शरद पवार (Sharad Pawar) यांना प्रकृती अस्वस्थ झाल्याने पुण्यातील रुग्णालयात दाखल करण्यात आले असून त्यांच्या आरोग्याबाबत महत्त्वाची अपडेट समोर आली आहे. डॉक्टरांच्या माहितीनुसार, त्यांची तब्येत सध्या स्थिर असून पुढील ४८ तासांत त्यांना घरी सोडण्यात येणार आहे.

 

पवार यांच्यावर रुबी हॉल क्लिनिक येथे उपचार सुरू आहेत. उलट्यांचा त्रास झाल्याने शरीरात पाण्याची कमतरता (डिहायड्रेशन) निर्माण झाली होती. खबरदारीचा उपाय म्हणून त्यांना तातडीने रुग्णालयात दाखल करण्यात आले. आवश्यक उपचारानंतर त्यांच्या प्रकृतीत सुधारणा झाल्याचे वैद्यकीय पथकाने स्पष्ट केले.

 

डॉक्टरांनी दिलेल्या माहितीनुसार, सर्व तपासण्यांचे अहवाल समाधानकारक आले आहेत. रक्ततपासणी, सिटीस्कॅनसह इतर आवश्यक वैद्यकीय चाचण्या करण्यात आल्या असून कोणतीही गंभीर बाब आढळलेली नाही. सध्या ते नियमित आहार घेत असून विश्रांती घेत आहेत.

 

वैद्यकीय सल्ल्यानुसार, डिस्चार्जनंतरही काही दिवस ते पुण्यातच विश्रांती घेणार असून त्यानंतर मुंबईकडे रवाना होण्याची शक्यता आहे. डॉक्टरांनी पूर्ण विश्रांतीचा सल्ला दिला आहे.

 

याआधीही छातीत कफ झाल्याने त्यांना बारामतीहून पुण्यात उपचारासाठी आणण्यात आले होते. त्यावेळी पाच दिवस उपचारानंतर प्रकृतीत सुधारणा झाल्याने त्यांना घरी सोडण्यात आले होते.

 

दरम्यान, पवार यांच्या प्रकृतीबाबत कार्यकर्ते आणि समर्थकांमध्ये चिंता व्यक्त होत असली तरी सध्याची स्थिती स्थिर असून काळजीचे कारण नसल्याचे रुग्णालय प्रशासनाने स्पष्ट केले आहे.