द्वारका रोड अपघात प्रकरण : अल्पवयीन आरोपीची ओळख जाहीर करण्यास बंदी घालण्याची मागणी

Image Source:(Internet) 

द्वारका रोड (Dwarka Road) अपघात प्रकरणातील अल्पवयीन आरोपी चालकाची ओळख माध्यमांतून उघड होत असल्याचा दावा करत कुटुंबीयांनी दिल्ली उच्च न्यायालयात धाव घेतली आहे. तातडीच्या उल्लेखाला (Urgent Mentioning) न्यायालयाने परवानगी दिली असून या याचिकेवर आजच सुनावणी होण्याची शक्यता आहे.

 

कुटुंबीयांनी न्यायालयाकडे माध्यमांना अल्पवयीन आणि त्याच्या नातेवाईकांची ओळख जाहीर करण्यास मनाई करण्याचे निर्देश देण्याची मागणी केली आहे.

 

दिल्लीतील द्वारका परिसरात अलीकडेच झालेल्या भीषण रस्ते अपघातात दुचाकीस्वाराचा मृत्यू झाला होता. या प्रकरणात एका अल्पवयीन चालकावर निष्काळजीपणे वाहन चालविल्याचा आरोप आहे. अपघातानंतर हे प्रकरण देशभरात चर्चेचा विषय ठरले. विविध माध्यमांवर आरोपी अल्पवयीन व त्याच्या कुटुंबीयांबाबत माहिती प्रसारित होऊ लागल्याने वाद निर्माण झाला.

याच पार्श्वभूमीवर कुटुंबीयांनी उच्च न्यायालयात याचिका दाखल केली आहे.

 

अल्पवयीन आरोपीची ओळख सार्वजनिक करण्यास माध्यमांना प्रतिबंध घालावा-

कुटुंबीयांचे नाव, छायाचित्रे किंवा इतर वैयक्तिक माहिती प्रसिद्ध करू नये

प्रकरणाची वार्तांकन करताना किशोर न्याय कायद्यांचे काटेकोर पालन करावे-

 

‘मीडिया ट्रायल’मुळे अल्पवयीनाच्या मूलभूत अधिकारांवर आणि भविष्यात गंभीर परिणाम होऊ शकतो, असा दावा करण्यात येत आहे.

 

भारतामध्ये लागू असलेल्या किशोर न्याय (बालकांची देखरेख व संरक्षण) अधिनियम, 2015नुसार कोणत्याही अल्पवयीन आरोपीची ओळख जाहीर करणे कायद्याने प्रतिबंधित आहे.

 

अल्पवयीनांच्या पुनर्वसन आणि संरक्षणाला प्राधान्य देणे हे या कायद्याचे प्रमुख उद्दिष्ट आहे.

 

या प्रकरणातील सुनावणीकडे कायदेविषयक तज्ज्ञांसह माध्यमविश्वाचेही लक्ष लागले आहे. न्यायालयाने माध्यमांवर अंतरिम स्थगिती दिल्यास, अल्पवयीन आरोपींच्या ओळखीबाबत भविष्यातील प्रकरणांसाठी हा निर्णय महत्त्वाचा ठरू शकतो.