भारत-अमेरिका व्यापार करार; शून्य टक्के टॅरिफची शक्यता,पण...

 

 Image Source:(Internet)

भारत (India) आणि अमेरिका यांच्यात महत्त्वपूर्ण व्यापार करार झाल्यानंतर दोन्ही देशांच्या व्यापार संबंधांना नवी दिशा मिळाली आहे. या करारानंतर अमेरिकेचे राष्ट्राध्यक्ष डोनाल्ड ट्रम्प यांनी भारतावरील टॅरिफ कमी करण्याची घोषणा केली. सुरुवातीला ५० टक्के असलेला टॅरिफ १८ टक्क्यांवर आणण्यात आल्याचे सांगण्यात आले आहे.

 

दरम्यान, जशी सवलत अमेरिकेकडून बांग्लादेशला देण्यात आली आहे, तशीच सवलत भारतालाही मिळण्याची शक्यता व्यक्त करण्यात येत आहे. मात्र त्यासाठी अमेरिकेने एक महत्त्वाची अट घातली आहे. या संदर्भात केंद्रीय वाणिज्य आणि उद्योग मंत्री पीयूष गोयल यांनी माहिती दिली.

 

गोयल यांच्या मते, अमेरिकेने बांग्लादेशमधून निर्यात होणाऱ्या कापडांवर शून्य टक्के टॅरिफ लागू करण्याचा निर्णय घेतला आहे. परंतु त्यासाठी लागणारा कच्चा माल—विशेषतः कापूस आणि कृत्रिम धागे—अमेरिकेतूनच खरेदी करणे बंधनकारक आहे. त्याच धर्तीवर, जर भारतीय कंपन्यांनी अमेरिकेत उत्पादित कापसापासून कापड तयार करून ते अमेरिकेत निर्यात केले, तर त्या उत्पादनांवर शून्य टक्के टॅरिफ लागू होऊ शकतो.

 

या निर्णयामुळे भारतीय कापूस उत्पादक शेतकऱ्यांवर परिणाम होण्याची शक्यता व्यक्त केली जात आहे. आधीच विविध अडचणींना सामोरे जाणाऱ्या कापूस शेतकऱ्यांसाठी ही नवी अट आव्हानात्मक ठरू शकते, अशी चिंता व्यक्त होत आहे. व्यापार करारामुळे निर्यात क्षेत्राला चालना मिळण्याची अपेक्षा असली तरी, देशांतर्गत कापूस उत्पादनावर त्याचे परिणाम काय होतील, याकडे सर्वांचे लक्ष लागले आहे.