संघाच्या कार्यक्रमाला सलमान, ठाकरे गैरहजर’; नितेश राणेंची उद्धव–राज ठाकरेंवर जोरदार टीका

 

 Image Source:(Internet)

मंत्री नितेश राणे (Nitesh Rane) यांनी शिवसेना (उबाठा) प्रमुख उद्धव ठाकरे आणि मनसे अध्यक्ष राज ठाकरे यांच्यावर पुन्हा एकदा तीव्र शब्दांत हल्लाबोल केला आहे. राष्ट्रीय स्वयंसेवक संघाच्या शताब्दी वर्षानिमित्त वरळी डोम येथे झालेल्या कार्यक्रमात अभिनेता सलमान खानसह अनेक मान्यवर उपस्थित होते. या पार्श्वभूमीवर प्रतिक्रिया देताना राणेंनी ठाकरे बंधूंवर खोचक टीका केली.

 

संघाच्या कार्यक्रमाला सलमान खान उपस्थित राहिला, पण उद्धव ठाकरे आले नाहीत, याकडे लक्ष वेधत राणे म्हणाले की, “संघाच्या व्यासपीठावर जाण्याची हिंमत सलमानने दाखवली; हेच उद्धव ठाकरेंना जमत नाही.” तसेच, राहुल गांधींसमोर उद्धव ठाकरे आपल्या वडिलांना ‘हिंदूहृदयसम्राट’ म्हणू शकत नाहीत, अशी टीकाही त्यांनी केली. उद्धव ठाकरे यांचे भाषण रटाळ असल्याचा उपरोधिक टोला देत, त्यातच त्यांनी “प्रवचनांमध्ये पीएचडी केली” अशी टिप्पणीही केली.

 

राज ठाकरे यांच्याबाबत बोलताना राणे अधिक आक्रमक झाले. “संघाच्या बौद्धिक कार्यक्रमांची दिशा मिळाली असती, तर वैचारिक स्पष्टता आली असती आणि पक्षातून मोठ्या प्रमाणावर लोक बाहेर गेले नसते,” असा दावा त्यांनी केला. सकाळी लवकर उठून संघाच्या कार्यक्रमांना हजेरी लावली असती, तर पक्ष चालवण्याचं शहाणपण मिळालं असतं, असा टोमणाही त्यांनी लगावला.

 

मालेगावातील वक्तव्यांचा संदर्भ देत राणेंनी राज ठाकरे यांच्यावर दुटप्पीपणाचा आरोप केला. “मौलवींवर बोलताना शांतता आणि हिंदुत्वावर मात्र आक्रमक भूमिका—ही विसंगती जनतेच्या लक्षात येते,” असे म्हणत त्यांनी मुंब्र्यात जाऊन भूमिका स्पष्ट करण्याचे आव्हान दिले.

 

दरम्यान, जिल्हा परिषद, पंचायत समिती आणि इतर निवडणुकांतील निकालांचा उल्लेख करत राणेंनी महायुतीची ताकद अधोरेखित केली. “लोकसभा, विधानसभा ते नगरपालिका—सगळीकडे महायुतीची पकड मजबूत झाली आहे. कोकण हा आमचा बालेकिल्ला आहे,” असे ते म्हणाले. सिंधुदुर्गमध्ये उबाठाला मर्यादित यश मिळाल्याचा दावा करत, जनतेच्या विश्वासाला कृतीतून उतरवू, असेही त्यांनी स्पष्ट केले. मुंबईतील निवडणूक निकालांचा दाखला देत त्यांनी “हिंदुत्वविरोधी राजकारणाला मतदारांनी नकार दिला,” असा टोला लगावला.

 

नितेश राणेंच्या या वक्तव्यांमुळे राज्यातील राजकीय वातावरण पुन्हा तापले असून, त्यांच्या टीकेवर विविध प्रतिक्रिया उमटत आहेत.