नागपूर पोलिसांना चार वर्षांपासून गुंगारा देणारा NDPS प्रकरणातील फरार आरोपी अखेर जेरबंद!

    20-Nov-2026
Total Views |

NDPS case
 
नागपूर : अमली पदार्थांच्या तस्करीविरोधात नागपूर पोलिसांनी कारवाईचा वेग वाढवला असून, चार वर्षांपासून पोलिसांच्या हातावर तुरी देणाऱ्या NDPS कायद्यांतर्गत वाँटेड आरोपीला अखेर अटक करण्यात आली आहे. पोलीस परिमंडळ क्रमांक-४ च्या विशेष पथकाने गुप्त माहितीच्या आधारे गणेशपेठ पोलीस ठाण्याच्या हद्दीतील बजेरिया मच्छी मार्केट परिसरातून ही कारवाई केली. सलाम शेख कलाम शेख (वय ३४, रा. अन्सार नगर, मोमीनपुरा, नागपूर) असे अटक करण्यात आलेल्या आरोपीचे नाव आहे.
 
अजनी पोलीस ठाण्यात NDPS कायद्यांतर्गत दाखल असलेल्या गुन्ह्यात तो मागील चार वर्षांपासून फरार होता. गुन्हा दाखल झाल्यापासून अटकेपासून बचाव करण्यासाठी तो पोलिसांपासून लपून राहत होता. त्याचा शोध घेण्यासाठी पोलिसांकडून सातत्याने प्रयत्न सुरू होते.
 
गुप्त माहिती मिळताच पोलिसांची धडक कारवाई-
पोलीस उपायुक्त रश्मिता राव यांच्या मार्गदर्शनाखाली परिमंडळ क्रमांक-४ चे विशेष पथक फरार आरोपींचा शोध घेत असताना सलाम शेख याच्याबाबत महत्त्वाची माहिती मिळाली. अजनी पोलीस ठाण्यातील NDPS गुन्ह्यातील आरोपी गणेशपेठ हद्दीतील बजेरिया परिसरातील मच्छी मार्केट येथे आल्याची माहिती पोलिसांना मिळाली.
 
या माहितीची खातरजमा करून विशेष पथकाने १९ नोव्हेंबर २०२६ रोजी सायंकाळी सुमारे ७.३५ वाजता संबंधित परिसरात शोधमोहीम राबवली. मिळालेल्या वर्णनावरून संशयित व्यक्तीची ओळख पटवून पोलिसांनी त्याला ताब्यात घेतले.
पंचांसमक्ष चौकशी केली असता त्याने आपले नाव सलाम शेख कलाम शेख असल्याचे सांगितले. त्यानंतर पोलिसांनी त्याची पार्श्वभूमी आणि गुन्हेगारी नोंदी तपासल्या असता अमली पदार्थविरोधी कायद्यांतर्गत त्याच्याविरुद्ध इतर पोलीस ठाण्यांमध्येही गुन्हे दाखल असल्याचे उघड झाले.
 
आरोपीविरुद्ध सात अन्य NDPS गुन्ह्यांची नोंद-
पोलिसांच्या रेकॉर्डनुसार, अजनी पोलीस ठाण्यातील प्रकरणाव्यतिरिक्त सलाम शेख याच्याविरुद्ध विविध पोलीस ठाण्यांमध्ये NDPS कायद्यांतर्गत आणखी सात गुन्हे दाखल आहेत. त्यामुळे अमली पदार्थांशी संबंधित अनेक प्रकरणांमध्ये त्याचे नाव समोर आले आहे.
 
चार वर्षांपासून फरार असलेल्या आरोपीला पकडणे ही झोन-४ विशेष पथकाची महत्त्वपूर्ण कामगिरी मानली जात आहे. अटकेनंतर आरोपीला पुढील कायदेशीर कारवाईसाठी अजनी पोलिसांच्या ताब्यात देण्यात आले आहे.
 
डीसीपी रश्मिता राव यांच्या मार्गदर्शनाखाली मोहीम-
पोलीस उपायुक्त परिमंडळ क्रमांक-४ रश्मिता राव यांच्या मार्गदर्शनाखाली विशेष पथकाने ही कारवाई केली. गोपनीय माहितीच्या आधारे फरार आरोपीचा शोध घेऊन त्याला अटक करण्यात पथकाला यश आले.
 
सध्या आरोपीची चौकशी सुरू असून, त्याच्याविरुद्ध दाखल असलेल्या इतर गुन्ह्यांबाबतही पोलीस माहिती गोळा करीत आहेत. अमली पदार्थांच्या गुन्ह्यांशी संबंधित त्याच्या इतर संभाव्य संबंधांचीही तपासणी केली जात आहे.