‘एकनाथ शिंदे पुन्हा मुख्यमंत्री होतील असं वाटत नाही’; गुणरत्न सदावर्तेंचे मोठे विधान

Image Source:(Internet)

मुंबई : राज्यातील दसरा मेळाव्यांची धामधूम संपल्यानंतर आता राजकीय आरोप-प्रत्यारोपांना सुरुवात झाली आहे. ज्येष्ठ वकील गुणरत्न सदावर्ते यांनी उपमुख्यमंत्री एकनाथ शिंदे यांच्यासह उद्धव ठाकरे यांच्या दसरा मेळाव्यांवर टीका केली आहे. एकनाथ शिंदे पुन्हा मुख्यमंत्री होतील, असे आपल्याला वाटत नसल्याचे भाकीतही त्यांनी केले. त्यांच्या या वक्तव्यामुळे राजकीय वर्तुळात चर्चेला सुरुवात झाली आहे.

मंगळवारी राज्यभरात दसरा उत्साहात साजरा करण्यात आला. यानिमित्त भाजप नेत्या पंकजा मुंडे, मराठा आरक्षण आंदोलनाचे नेते मनोज जरांगे पाटील आणि मुंबईत शिवसेनेच्या शिंदे व ठाकरे गटाचे दसरा मेळावे पार पडले. या मेळाव्यांमध्ये विविध राजकीय मुद्द्यांवरून नेत्यांनी आपापल्या भूमिका मांडल्या. मात्र, या कार्यक्रमांवर प्रतिक्रिया देताना गुणरत्न सदावर्ते यांनी दोन्ही शिवसेना गटांवर निशाणा साधला.

एकनाथ शिंदे यांच्या मेळाव्यातून काही ठोस ऐकायला मिळेल, अशी अपेक्षा होती; मात्र तेथेही निराशा झाल्याचे सदावर्ते म्हणाले. दसऱ्यासारख्या सणाच्या दिवशी लोकांना शुभेच्छा आणि सकारात्मक संदेश मिळण्याऐवजी टीका आणि आरोप ऐकावे लागले, असा टोला त्यांनी लगावला. महाराष्ट्राला नेमके कुठे नेऊन ठेवले आहे, असा सवालही त्यांनी उपस्थित केला.

उद्धव ठाकरे यांच्या मेळाव्यावरही सदावर्ते यांनी टीका केली. तसेच, मनोज जरांगे पाटील यांच्या दसरा मेळाव्यातील भाषणाचा संदर्भ देत त्यांनी उदय सामंत यांच्या संबोधनावर भाष्य केले. यावेळी जरांगे यांना ‘संघर्षयोद्धा’ असे संबोधले गेले नाही, तर केवळ मनोज जरांगे पाटील असा उल्लेख करण्यात आला, असे सांगत त्यांनी राजकीय घडामोडींवर टिप्पणी केली.

शिंदे पुन्हा मुख्यमंत्री होणे सोपे नाही-
एकनाथ शिंदे यांच्या राजकीय भवितव्याबाबत बोलताना सदावर्ते यांनी स्पष्ट शब्दांत आपले मत मांडले. उद्धव ठाकरे यांच्याशी झालेल्या राजकीय संघर्षानंतर एकनाथ शिंदे मुख्यमंत्री झाले; मात्र आता ते पुन्हा या पदावर विराजमान होतील, असे वाटत नसल्याचे त्यांनी म्हटले. पुन्हा मुख्यमंत्री होणे त्यांच्यासाठी सोपे नसेल, असा दावाही त्यांनी केला.

शिंदे यांना आपल्या मुलाला मंत्रिमंडळात स्थान मिळावे, अशी अपेक्षा असल्याची टिप्पणीही सदावर्ते यांनी केली. राजकीय आश्वासनांच्या माध्यमातून नेत्यांना अपेक्षा दाखवल्या जातात; मात्र प्रत्यक्षात काय घडते, हे महत्त्वाचे असते, अशा आशयाची टीका त्यांनी केली.

गुणरत्न सदावर्ते यांनी यापूर्वीही एकनाथ शिंदे यांच्यावर टीका केली आहे. आता दसरा मेळाव्याच्या पार्श्वभूमीवर त्यांनी केलेल्या विधानामुळे शिंदे गटाकडून काय प्रतिक्रिया येते, याकडे राजकीय वर्तुळाचे लक्ष लागले आहे. विशेषतः एकनाथ शिंदे यांच्या भविष्यातील मुख्यमंत्रिपदाबाबत सदावर्ते यांनी व्यक्त केलेल्या मतावर शिवसेनेच्या शिंदे गटातील नेते काय भूमिका घेतात, हे पाहणे महत्त्वाचे ठरणार आहे.