काँग्रेसला अंबरनाथमध्ये मोठा धक्का; १२ नगरसेवक थेट भाजपमध्ये दाखल

 

 Image Source:(Internet)

राज्यातील २९ महापालिकांच्या निवडणुकांच्या पार्श्वभूमीवर राजकीय हालचालींना वेग आला असताना अंबरनाथमध्ये काँग्रेसला (Congress) मोठा हादरा बसला आहे. नगर परिषदेच्या निवडणुकीत नुकतेच निवडून आलेले १२ नगरसेवक काँग्रेसला सोडचिठ्ठी देत भाजपमध्ये प्रवेश करत आहेत. या घडामोडीमुळे काँग्रेसच्या संघटनात्मक ताकदीवर गंभीर प्रश्नचिन्ह निर्माण झाले आहे.

 

भाजपचे प्रदेशाध्यक्ष रवींद्र चव्हाण आणि मंत्री गणेश नाईक यांच्या उपस्थितीत हा पक्षप्रवेश होणार आहे. यावेळी भाजप नेते संजीव नाईक, दीपक म्हात्रे यांचीही उपस्थिती राहणार आहे. भाजपमध्ये प्रवेश करणाऱ्या नगरसेवकांमध्ये दर्शना पाटील, अर्चना पाटील, हर्षदा पाटील, तेजस्विनी पाटील, प्रदीप पाटील, विपुल पाटील, कबीर गायकवाड, मनीष म्हात्रे, धनलक्ष्मी जयशंकर, संजीवनी देवडे, दिनेश गायकवाड आणि किरण राठोड यांचा समावेश आहे.

 

अंबरनाथ शहरात यापूर्वी अंबरनाथ विकास आघाडी स्थापन करण्यात आली होती. या आघाडीत भाजप, अजित पवार गट आणि काँग्रेस सहभागी असल्याने काँग्रेसची भाजपसोबत जवळीक वाढल्याची चर्चा राज्यभर सुरू झाली होती. या पार्श्वभूमीवर काँग्रेसचे प्रदेशाध्यक्ष हर्षवर्धन सपकाळ यांनी संबंधित नगरसेवकांवर शिस्तभंगाची कारवाई केली होती. या कारवाईमुळे स्थानिक पातळीवर नाराजीचे वातावरण निर्माण झाले आणि त्यानंतर राजकीय हालचालींना वेग आला.

 

या सर्व घडामोडीनंतर १२ नगरसेवकांनी भाजपमध्ये प्रवेश करण्याचा निर्णय घेतल्याने काँग्रेसला मोठा राजकीय धक्का मानला जात आहे. निवडून आलेले नगरसेवक पक्षादेश पाळत नसल्याचा आरोप होत असून, पक्षनिष्ठा आणि शिस्तीवर प्रश्न उपस्थित केले जात आहेत. या घटनेमुळे काँग्रेससमोर विश्वासार्हतेचे आव्हान उभे राहिले आहे.

 

दरम्यान, या विषयावर प्रतिक्रिया देताना हर्षवर्धन सपकाळ यांनी काँग्रेसचा भाजपसोबत कोणताही संबंध नसल्याचे स्पष्ट केले. निवडणूक लढवताना भाजपसोबत कोणतीही युती करण्यात आलेली नाही, तसेच काँग्रेस भाजपला पाठिंबा देणार नाही, असे त्यांनी ठामपणे सांगितले. या प्रकरणी तालुका अध्यक्षांकडून स्पष्टीकरण मागितल्याचेही त्यांनी नमूद केले.