प्रजासत्ताक दिनी नागपुरात अमली पदार्थविरोधी कारवाई : ४१ किलो गांजा जप्त, दोघांना अटक

 

 Image Source:(Internet)

प्रजासत्ताक दिनाच्या (Republic Day) दिवशी नागपूर गुन्हे शाखेच्या सामाजिक सुरक्षा शाखा (SSB) आणि एनडीपीएस पथकाने संयुक्तरित्या केलेल्या कारवाईत तब्बल ४१ किलोहून अधिक गांजा हस्तगत करण्यात आला. याप्रकरणी दोघा आरोपींना अटक करण्यात आली असून ही कारवाई यशोधरा नगर पोलीस ठाण्याच्या हद्दीत करण्यात आली.

 

पोलीसांनी दिलेल्या माहितीनुसार, २६ जानेवारी रोजी पहाटे ३ ते सकाळी ६.३० या कालावधीत वंजरा ले-आउट येथील स्मॉल फॅक्टरी परिसरात, कोकण अ‍ॅग्रो मरीन इंडस्ट्रीजजवळ संशयास्पद ट्रक थांबवून तपासणी करण्यात आली. गुप्त माहितीच्या आधारे ही कारवाई करण्यात आली असून पंचनामा करून वाहनाची सखोल झडती घेण्यात आली.

 

या प्रकरणात ट्रक चालक व मालक मोहम्मद शमसाद इम्तियाज अहमद (४०, रा. संघर्ष नगर, नागपूर) आणि शाहरुख खान इक्बाल खान (२६, रा. कुंदनलाल गुप्ता नगर, विटाभट्टी, यशोधरा नगर) यांना अटक करण्यात आली आहे. दोघेही अमली पदार्थांची वाहतूक करण्यासाठी एकत्र काम करत असल्याचे तपासात स्पष्ट झाले आहे.

 

ट्रकच्या केबिनमागे तयार करण्यात आलेल्या गुप्त कप्प्यात ४१.८४६ किलो गांजा आढळून आला. जप्त करण्यात आलेल्या गांजाची किंमत अंदाजे १०.३४ लाख रुपये आहे. तसेच सुमारे २० लाख रुपये किमतीचा आयशर ट्रक व २१ हजार रुपये किमतीचे तीन मोबाईल फोन असा एकूण ३०.५५ लाख रुपयांचा मुद्देमाल पोलिसांनी ताब्यात घेतला आहे.

 

तपासात आरोपी ओडिशातील सांबळपूर जिल्ह्यातील रेडाकुल गावातून गांजा खरेदी करून नागपुरात आणत असल्याची माहिती समोर आली आहे. ही खेप विटाभट्टी चौक येथील सोनू खान या फरार आरोपीने ओडिशातील दोन साथीदारांच्या मदतीने पुरविल्याचा संशय पोलिसांनी व्यक्त केला आहे. नागपुरात पुढील विक्रीसाठी हा गांजा आणण्यात येत होता.

 

या प्रकरणी एनडीपीएस कायद्याच्या कलम ८(क), २०(ब)(२)(क) आणि २९ अन्वये गुन्हा नोंदविण्यात आला असून फरार आरोपींचा शोध घेण्यासह अमली पदार्थ पुरवठा साखळीचा तपास सुरू आहे.

 

ही कारवाई सामाजिक सुरक्षा शाखेचे पोलीस निरीक्षक गजानन गुल्हाने व सहायक पोलीस निरीक्षक शिवाजी ननवरे यांच्या मार्गदर्शनाखाली करण्यात आली. पथकात शेषराव राऊत, अश्विन मांगे, समीर शेख, कुणाल मसराम, कुणाल बोडाखे, गणेश जोगेकर, विवेक अढाव आणि नितीन साळुंखे यांचा समावेश होता.

 

आंतरराज्य अमली पदार्थ तस्करीविरोधात कठोर पावले उचलली जात असून पुढील काळातही अशा कारवाया तीव्र केल्या जातील, असा इशारा पोलिसांनी दिला आहे.