देश सज्ज; २६ जानेवारीला साजरा करणार ७७वा प्रजासत्ताक दिन

 

 Image Source:(Internet)

देशभरात २६ जानेवारी २०२६ रोजी ७७वा प्रजासत्ताक दिन (Republic Day) मोठ्या उत्साहात साजरा केला जाणार आहे. दरवर्षीप्रमाणे यंदाही मुख्य सोहळा नवी दिल्लीतील कर्तव्य पथावर आयोजित करण्यात आला आहे. या राष्ट्रीय सोहळ्याबात देशभरात नागरिकांमध्ये उत्सुकता आणि अभिमानाचे वातावरण आहे.

 

प्रजासत्ताक दिनाच्या परेडमध्ये भारतीय लष्कर, नौदल आणि हवाई दलाची भव्य संचलन परेड पाहायला मिळणार आहे. या संचलनातून सशस्त्र दलांची शिस्त, एकात्मता आणि सामर्थ्याचे दर्शन घडणार आहे. आकाशात लढाऊ विमानांची थरारक प्रात्यक्षिके सादर होणार असून, स्वदेशी बनावटीची आधुनिक शस्त्रसामग्री आणि संरक्षण उपकरणांचे प्रदर्शनही यावेळी केले जाणार आहे.

 

यंदाही विविध राज्ये आणि केंद्रशासित प्रदेशांच्या आकर्षक झांक्यांकडे सर्वांचे लक्ष असणार आहे. या झांक्यांमधून भारताची समृद्ध संस्कृती, परंपरा, पर्यटन, सामाजिक संदेश तसेच विकासकामांचे चित्रण सादर केले जाणार आहे. प्रेक्षकांसाठी हा परेडमधील सर्वाधिक आकर्षणाचा भाग ठरतो.

 

याशिवाय शालेय विद्यार्थी, एनसीसी कॅडेट्स, लोकनृत्य कलाकार आणि सांस्कृतिक पथकांचे सादरीकरण कार्यक्रमात रंगत भरणार आहे. त्यांच्या सादरीकरणातून आनंद आणि उत्साहाचे वातावरण निर्माण होणार आहे. या सोहळ्याला देशातील वरिष्ठ नेते आणि परदेशी मान्यवर पाहुणे उपस्थित राहण्याची शक्यता असून, यामुळे जागतिक स्तरावर भारताची ताकद अधोरेखित होणार आहे.

 

१९५० साली भारतीय संविधान अंमलात आल्याच्या स्मरणार्थ प्रजासत्ताक दिन साजरा केला जातो. हा दिवस लोकशाही, एकता आणि राष्ट्रीय अभिमानाचे प्रतीक आहे. प्रजासत्ताक दिनाची परेड भारताच्या आजवरच्या प्रवासाची आठवण करून देत, उज्ज्वल भविष्यासाठीची आशाही बळकट करते.