महापौरपद आरक्षण सोडत जाहीर; राज्यातील 29 महापालिकांपैकी 15 ठिकाणी महिला नेतृत्व निश्चित

 

 Image Source:(Internet)

राज्यातील 29 महानगरपालिकांमध्ये महापौरपदासाठी (Mayor) आरक्षणाची सोडत आज जाहीर करण्यात आली. नगरविकास राज्यमंत्री माधुरी मिसाळ यांच्या उपस्थितीत ही प्रक्रिया पार पडली. यावेळी भाजपचे महामंत्री राजेश शिरवडकर, ठाकरे गटाच्या नेत्या व माजी महापौर किशोरी पेडणेकर, आमदार मनोज जामसुतकर तसेच राष्ट्रवादी काँग्रेस (अजित पवार गट) चे आनंद परांजपे उपस्थित होते.

 

महापालिकांमध्ये लागू करण्यात आलेल्या ५० टक्के महिला आरक्षणामुळे यंदा १५ महापालिकांमध्ये महिला महापौर विराजमान होणार आहेत. उर्वरित १४ महापालिकांमध्ये सर्वसाधारण प्रवर्गासाठी महापौरपद खुले ठेवण्यात आले आहे.

 

महिला आरक्षणांतर्गत ४ महापालिकांमध्ये ओबीसी महिला, तर ९ महापालिकांमध्ये खुल्या प्रवर्गातील महिलांसाठी आरक्षण लागू झाले आहे.

 

राज्यातील सर्व 29 महापालिकांसाठी १५ जानेवारी रोजी मतदान पार पडले होते, तर १६ जानेवारीला मतमोजणी पूर्ण झाली होती. आता महापौर आरक्षण स्पष्ट झाल्याने महापालिकांमधील सत्तास्थापनेच्या हालचालींना वेग येणार आहे.

 

 

दरम्यान महापौरपदाचे आरक्षण निश्चित झाल्यानंतर आता प्रत्येक महापालिकेत सत्तास्थापनेचे गणित कसे जुळते, याकडे राजकीय वर्तुळाचे लक्ष लागले आहे.