मनपा निवडणूक; मतदार ओळखपत्र नसेल तरी मतदान शक्य, आयोगाने 12 ओळखपत्रांना दिली मान्यता

 

 Image Source:(Internet)

महानगरपालिकेच्या निवडणुकीसाठी (Elections) उद्या, 15 जानेवारी रोजी मतदान होणार असून नागरिकांनी मतदानापूर्वी आपले नाव मतदार यादीत नोंदणीकृत आहे की नाही, याची खात्री करून घेण्याचे आवाहन निवडणूक प्रशासनाने केले आहे. मतदान प्रक्रिया सकाळी 7.30 वाजता सुरू होऊन सायंकाळी 5.30 वाजेपर्यंत चालणार आहे.

 

मतदार ओळखपत्र (EPIC) उपलब्ध नसले तरीही कोणाचाही मतदानाचा हक्क हिरावून घेतला जाणार नाही, असे स्पष्ट करत निवडणूक प्रशासनाने दिलासा दिला आहे. निवडणूक आयोगाच्या नियमांनुसार मतदार भारतीय नागरिक असणे, वय किमान 18 वर्षे पूर्ण असणे आणि संबंधित प्रभागाच्या मतदार यादीत नाव असणे आवश्यक आहे. तसेच ज्या वॉर्डमध्ये मतदान करायचे आहे, त्या वॉर्डचा रहिवासी असणे बंधनकारक आहे.

 

मतदारांनी आपले नाव तपासण्यासाठी महाराष्ट्र राज्य निवडणूक आयोगाच्या mahasecvoterlist.in या अधिकृत संकेतस्थळाला भेट देऊ शकतात. येथे ‘महानगरपालिका’ पर्याय निवडून जिल्हा व स्थानिक संस्था म्हणून बीएमसीची निवड केल्यानंतर नाव किंवा मतदार ओळखपत्र क्रमांकाच्या आधारे माहिती मिळवता येते. याशिवाय बीएमसीच्या अधिकृत वेबसाइटवरही मतदार शोधाची सुविधा उपलब्ध आहे.

 

तसेच केंद्र निवडणूक आयोगाच्या voters.eci.gov.in या पोर्टलवर EPIC क्रमांक टाकून मतदार आपला अनुक्रमांक, वॉर्ड क्रमांक तसेच मतदान केंद्राचा संपूर्ण पत्ता जाणून घेऊ शकतात. स्मार्टफोन वापरकर्त्यांसाठी उपलब्ध असलेल्या मतदार हेल्पलाइन अ‍ॅपद्वारेही ही माहिती सहज मिळणार आहे.

 

ऑनलाइन माहिती मिळण्यात अडचण आल्यास नागरिकांनी 1916 या बीएमसी सेंट्रल हेल्पलाइनवर किंवा 022-22754028, 9619512847 या बीएमसी निवडणूक सेलच्या क्रमांकांवर संपर्क साधावा, असे प्रशासनाने कळवले आहे.

 

मतदानाच्या दिवशी मतदान केंद्रावर प्रथम मतदाराची नोंद व ओळखपत्राची तपासणी केली जाईल. त्यानंतर बोटावर अमिट शाई लावून ईव्हीएमद्वारे मतदान करण्याची प्रक्रिया पूर्ण केली जाईल. मतदारांसाठी ‘नोटा’चा पर्यायही उपलब्ध असणार आहे.

 

मतदार ओळखपत्र नसल्यास, निवडणूक आयोगाने मान्य केलेल्या 12 ओळखपत्रांपैकी कोणतेही एक सादर करून मतदान करता येईल. यामध्ये पासपोर्ट, आधार कार्ड, ड्रायव्हिंग लायसन्स, पॅन कार्ड, केंद्र किंवा राज्य सरकारने जारी केलेले ओळखपत्र, फोटो असलेले बँक पासबुक तसेच इतर शासकीय मान्यताप्राप्त ओळखपत्रांचा समावेश आहे.

 

दरम्यान, 16 जानेवारी रोजी मतमोजणी होणार असून लोकशाहीच्या उत्सवात नागरिकांनी निर्भयपणे आणि मोठ्या संख्येने सहभाग घ्यावा, असे आवाहन प्रशासनाकडून करण्यात आले आहे.