गोंडवाना पिंपरीत बनावट दारूचा कारखाना; राज्य उत्पादन शुल्क विभागाची मोठी कारवाई

 

 Image Source:(Internet)

राज्य उत्पादन शुल्क विभागाने गोंडवाना पिंपरी (Gondwana Pimpri) येथील माय टाऊन सोसायटी सेक्टर-8 मध्ये अवैध बनावट दारूच्या उत्पादनावर छापा टाकून मोठी कारवाई केली आहे. येथे देशी आणि विदेशी बनावट दारू बनवण्याचा कारखाना सुरू असल्याचा शोध लागला असून, तो लवकरच बंद करण्यात आला आहे.

 

घटनास्थळावरून १०९० लिटर बनावट देशी दारू, महाराष्ट्रात विक्रीवर बंदी घालण्यात आलेल्या गोवा व्हिस्कीच्या ३५६ बाटल्या, ९० बाटल्या देशी बनावट दारू, इलेक्ट्रॉनिक बाटल सीलिंग मशीन, बनावट रॉकेट देशी दारूचे कागदी लेबल, विविध प्रकारच्या बाटल्या, प्लास्टिकच्या बनावट लेबलसह बनावट विदेशी दारूचे साहित्य आणि एक चारचाकी वाहन जप्त करण्यात आले आहे. या सर्वांचा एकूण मुद्देमाल २४ लाखांहून अधिक किंमतीचा आहे.

 

या प्रकरणी शुभम गोविंद तिवारी (फरार मुख्य आरोपी), गोविंद रामदत्त तिवारी, शैलेंद्र धुर्वे, रघुनाथ उईके, राजकुमार उईके, द्वारका शिवलाल इनवाती आणि प्रमोद नथ्थुजी सयाम यांच्याविरुद्ध गुन्हा नोंदवण्यात आला आहे.

 

कारवाई विभागीय भरारी पथकाच्या निरीक्षक दशरथ क्षीरसागर, दुय्यम निरीक्षक जगदीश पवार आणि इतर अधिकार्‍यांच्या मार्गदर्शनाखाली करण्यात आली. जवान राहुल सपकाळ, गजानन राठोड, सुधीर मानकर, किरण वैद्य, सचिन आडोळे व विनोद डुंबरे यांनी कारवाईत सहकार्य केले.

 

तपास दुय्यम निरीक्षक जगदीश पवार करत असून, अवैध मद्य उत्पादन, विक्री आणि वाहतुकीशी संबंधित तक्रारीसाठी राज्य उत्पादन शुल्क विभागाच्या टोलफ्री क्रमांक 18002339999 किंवा व्हॉट्सॲप क्रमांक 8422001133 वर संपर्क करण्याचे आवाहन करण्यात आले आहे.