नेपाळमध्ये सोशल मीडिया बॅनवरून संतापाचा स्फोट; 5 मृत, शेकडो जखमी

 

 (Image Source-Internet)

 

नेपाळ (Nepal) सरकारने फेसबुक, ट्विटर (X), इंस्टाग्राम, यूट्यूबसह तब्बल 26 सोशल मीडिया प्लॅटफॉर्मवर बंदी घातल्याने तरुणाई रस्त्यावर उतरली आहे. 3 सप्टेंबरपासून लागू झालेल्या या निर्णयाविरोधात सोमवारी काठमांडूमध्ये संसद भवनाबाहेर हजारोंनी जोरदार आंदोलन छेडले.

निदर्शकांनी थेट संसद भवनाच्या गेट क्रमांक 1 आणि 2 वर कब्जा केला. पोलिसांनी लाठीमार, अश्रुधुराच्या नळकांड्या आणि पाण्याची फवारणी करून आंदोलकांना रोखण्याचा प्रयत्न केला. मात्र, संघर्षादरम्यान किमान 5 जणांचा मृत्यू झाला असून, शेकडो जखमी झाल्याची माहिती आहे.

हिंसाचारानंतर राजधानीत रात्री 10 वाजेपर्यंत कर्फ्यू लागू करण्यात आला आहे. राष्ट्रपती भवन, उपराष्ट्रपती निवास आणि पंतप्रधान निवासस्थानाजवळ सैन्य तैनात करण्यात आले आहे. पोलिसांच्या अंदाजानुसार सुमारे 12 हजार निदर्शक आंदोलनात सहभागी झाले होते. गंभीर परिस्थिती पाहता सरकारने आपत्कालीन सुरक्षा बैठक बोलावली आहे.

नेपाळच्या दळणवळण आणि माहिती तंत्रज्ञान मंत्रालयाने सांगितले की, सोशल मीडिया कंपन्यांना सरकारी नोंदणी प्रक्रिया पूर्ण करण्यासाठी 28 ऑगस्ट ते 2 सप्टेंबरपर्यंत मुदत देण्यात आली होती. मात्र अंतिम तारखेपर्यंत नोंदणी न केल्याने 26 प्लॅटफॉर्मवर बंदी घालण्यात आली.

* **मेटा अॅप्स** : फेसबुक, इंस्टाग्राम, व्हॉट्सअॅप

* **व्हिडिओ/इमेज शेअरिंग** : यूट्यूब, स्नॅपचॅट, पिंटरेस्ट

* **नेटवर्किंग/बातम्या** : ट्विटर (X), लिंक्डइन, रेडिट

* **इतर अॅप्स** : डिस्कॉर्ड, क्वोरा, टम्बलर, थ्रेड्स, वीचॅट, क्लबहाऊस, मास्टोडॉन, रंबल, मीवी, VK, लाइन, इमो, झालो, सोल, बोटिम, हॅम्रो पॅट्रो

दरम्यान, टेलिग्रामवर आधीच जुलै 2025 मध्ये बंदी आणण्यात आली होती. नागरिकांच्या मते, सरकारच्या या निर्णयामुळे अभिव्यक्ती स्वातंत्र्यावर गदा आली असून, नेपाळमध्ये “जनरेशन Z” संतापाच्या ज्वालामुखीसारखा उद्रेक होत आहे.