महापालिका निवडणुकीपूर्वी शरद पवारांना पुण्यात धक्का? 'हा' नेता भाजपच्या संपर्कात

 

 Image Source:(Internet)

पुण्यात येत्या काही महिन्यांत स्थानिक स्वराज्य संस्थांच्या निवडणुका होणार आहेत. या पार्श्वभूमीवर राजकीय वर्तुळात जोरदार हालचाल सुरू आहे. त्यातच भाजप (BJP) आता राष्ट्रवादी काँग्रेसचे (NCP) नेते शरद पवार (Sharad Pawar) यांना पुण्यात मोठा धक्का देण्याच्या तयारीत असल्याचे संकेत मिळत आहेत.

 

याप्रसंगी, राष्ट्रवादी काँग्रेसच्या वडगाव शेरी विधानसभा मतदारसंघाचे आमदार बापूसाहेब पठारे यांचे पुत्र सुरेंद्र पठारे भाजपच्या संपर्कात असल्याची चर्चा रंगू लागली आहे. काही माहितीप्रमाणे, सुरेंद्र पठारे लवकरच भारतीय जनता पक्षात प्रवेश करणार आहेत.

 

सुरेंद्र पठारे यांनी भाजपच्या पुण्यातील काही बड्या नेत्यांसोबत विमान नगरमधील पंचतारांकित हॉटेलमध्ये बैठक केली होती. ही बैठक झाल्यानंतर भाजपच्या पदाधिकाऱ्यांनी आपल्या इच्छुकांना सांगितले की, "सुरेंद्र पठारे हे तुमचे पॅनल प्रमुख असतील, त्यामुळे त्यांच्याशी संपर्क साधा." भाजपने प्रभाग क्रमांक २, ३, ४ मध्ये त्यांच्या जवळच्या पदाधिकाऱ्यांना उमेदवारी देण्याची तयारी केली आहे, त्यानंतरच सुरेंद्र पठारे प्रवेश करतील अशी चर्चा आहे.

 

सुरेंद्र पठारे यांनी यावर प्रतिक्रिया देताना सांगितले की, “माझ्या भाजपमध्ये प्रवेशाबाबत अनेक दिवसांपासून चर्चा सुरू आहेत. काही लोक १ तारखेला किंवा ४ तारखेला प्रवेश होईल अशी माहिती देत होते, तर काहींनी २२ तारखेला प्रवेश होईल असे सांगितले. मात्र प्रत्यक्षात माझ्या प्रवेशाची अजून कोणतीही ठोस कल्पना नाही; ही केवळ चर्चाच आहेत.”

 

या घटनांनी पुण्यातील महापालिका निवडणुकीच्या राजकीय वातावरणात उत्सुकता आणि गदारोळ निर्माण केला आहे.