मतचोरीच्या आरोपांवरून राजकीय वाद; राहुल गांधींना उपमुख्यमंत्री एकनाथ शिंदेंचे प्रत्युत्तर

 

 Image Source;(Internet)

लोकसभेचे विरोधी पक्षनेते राहुल गांधी (Rahul Gandhi) यांनी पुन्हा एकदा भाजपवर थेट हल्ला चढवला आहे. कर्नाटकातील निवडणुकीदरम्यान अनेक मतदारांची नावे जाणूनबुजून वगळण्यात आली, असा गंभीर आरोप त्यांनी भाजप आणि निवडणूक आयोगावर केला. पत्रकार परिषदेत त्यांनी यासंदर्भातील काही व्हिडिओ पुरावेही सादर केले. या आरोपांनंतर राजकीय वर्तुळात चांगलीच खळबळ उडाली आहे.

 

राहुल गांधींच्या या वक्तव्यावर उपमुख्यमंत्री एकनाथ शिंदे यांनी जोरदार प्रत्युत्तर दिले. “राहुल गांधींनी ठोस पुरावे द्यावेत. निवडणूक आयोगाकडे दाद मिळाली नाही तर कोर्टात जावं. केवळ आरोप करून जनतेत संभ्रम पसरवणे चुकीचे आहे,” असे शिंदे म्हणाले.

 

ते पुढे म्हणाले की, “काँग्रेस जिंकते तेव्हा राहुल गांधी मतचोरीचा मुद्दा कधीच काढत नाहीत. पण पराभव झाला की लगेच भाजपावर आरोप सुरू होतात.”

 

शिंदेंनी आलन मतदारसंघाचे उदाहरण देत काँग्रेसलाच कोंडीत पकडले. “त्या ठिकाणी भाजप नव्हे तर काँग्रेसचा उमेदवार भोजराज पाटील विजयी झाला. मग मतचोरी झाली असेल तर ती काँग्रेसने केली की भाजपाने?” असा थेट सवाल त्यांनी केला.

 

या वादात **ईव्हीएम (EVM)**चाही उल्लेख झाला. त्यावर शिंदेंनी ठणकावून उत्तर दिले की, “ईव्हीएम पद्धत ही काँग्रेसच्या यूपीए सरकारच्या काळातच सुरू झाली होती. तेव्हा पंतप्रधान मनमोहन सिंग होते. मग आता राहुल गांधींना म्हणायचंय का की त्यांच्या सरकारनेच चुकीची प्रक्रिया राबवली?”

 

दरम्यान, राहुल गांधींनी केलेले आरोप निवडणूक आयोगाने फेटाळून लावले आहेत. त्यामुळे आता काँग्रेसकडून पुढील काय पाऊल उचलले जाईल, याकडे सर्वांचे लक्ष लागले आहे.