शरद पवारांविरोधात देशद्रोहाचा गुन्हा दाखल करा; भाजप आमदार पडळकरांची मागणी

 

 (Image Source-Internet)

राष्ट्रवादी काँग्रेसचे अध्यक्ष शरद पवार (Sharad Pawar) यांच्यावर भाजप आमदार गोपीचंद पडळकर यांनी पुन्हा एकदा जोरदार हल्लाबोल केला आहे. मारकडवाडी प्रकरणासह निवडणूक आयोगावर केलेल्या टीकेच्या पार्श्वभूमीवर बोलताना पडळकरांनी पवारांना “कारस्थानाचा कारखाना” असे संबोधले आणि त्यांच्यावर थेट देशद्रोहाचा गुन्हा दाखल करण्याची मागणी केली.

 

पडळकर म्हणाले की, “पवार कारस्थान रचण्यात पटाईत आहेत. मारकडवाडी प्रकरणाच्या वेळी त्यांनी थेट निवडणूक आयोगासारख्या संवैधानिक संस्थेवर प्रश्नचिन्ह उपस्थित केले. अशा संस्थेला बदनाम करणे म्हणजे लोकशाहीवर थेट घाला आहे.”

 

ते पुढे म्हणाले, “पवार एकीकडे मंडल यात्रा काढतात, तर दुसरीकडे त्यांचा नातू मराठा आरक्षणासाठी आंदोलन करतो. लोकांची दिशाभूल करणारी ही दुटप्पी भूमिका म्हणजे आधुनिक नारदमुनींचं काम आहे.”

 

राष्ट्रवादी नेते जयंत पाटील यांच्याबाबत बोलताना पडळकर म्हणाले, “जर जयंत पाटील आत्महत्या करतील तर मला आरोपी क्रमांक एक करा.” त्यांनी पुढे आरोप केला की, “सहकार क्षेत्रावर पवारांचे वर्चस्व आहे, पण जर या क्षेत्रात ईव्हीएम आली तर त्यांची पकड सैल होईल. म्हणूनच ते लोकांच्या मनात शंका निर्माण करत आहेत.”

 

शरद पवार यांनी विधानसभा निवडणुकीत त्यांना दोन लोकांनी १६० आमदार जिंकवून देण्याचा प्रस्ताव दिल्याचे जाहीर केले होते. यावर पडळकरांनी प्रश्न उपस्थित केला की, “हे गंभीर प्रकरण पवारांनी तातडीने गृहमंत्र्यांकडे नेणे अपेक्षित होते. पण त्यांनी हे राहुल गांधींना सांगितले. पोलिसांऐवजी राहुल गांधींकडे जाणे म्हणजे षड्यंत्रकारी डावपेच नव्हेत का?” असा थेट सवाल त्यांनी उपस्थित केला.