राहुल गांधींच्या निवडणूक गैरप्रकारांच्या आरोपांना पवारांचा पाठिंबा; आयोगाने करावी पारदर्शक चौकशी

(Image Source-Internet) 

काँग्रेस नेते राहुल गांधी (Rahul Gandhi) यांनी केलेल्या निवडणुकीतील अनियमिततेच्या आरोपांना राष्ट्रवादी काँग्रेस पक्षाचे अध्यक्ष शरद पवार यांनी शनिवारी ठाम पाठींबा दिला. नागपुरात झालेल्या पत्रकार परिषदेत त्यांनी स्पष्ट केले की, राहुल गांधींच्या विधानांमध्ये ठोस तथ्य आहे आणि निवडणूक आयोगाने याची सखोल चौकशी करून देशासमोर सत्य मांडले पाहिजे. आयोगाकडून राहुल गांधींकडून हलफनामा घेण्याची अट त्यांनी अन्याय्य ठरवली. यावेळी पवारांनी मुख्यमंत्री देवेंद्र फडणवीस यांच्यावरही निशाणा साधला.

 

शरद पवारांच्या उपस्थितीत राष्ट्रवादी काँग्रेस पक्षाच्या ‘मंडळ यात्रा’ला आज नागपुरातून सुरुवात झाली. या निमित्ताने झालेल्या संवादात त्यांनी उघड केले की, विधानसभा निवडणुकीच्या घोषणेनंतर काही लोकांनी त्यांच्यासमोर २८८ पैकी १६० जागा जिंकण्याचा दावा केला होता. सुरुवातीला दुर्लक्ष केलेल्या या बोलण्याकडे नंतर त्यांनी गांभीर्याने पाहिले आणि राहुल गांधींची त्यांच्यासोबत भेट घडवून आणली.

 

राहुल गांधींनी खोट्या मतदानाची अनेक उदाहरणे मांडल्याचे सांगत पवारांनी आयोगाच्या भूमिकेवर प्रश्न उपस्थित केला. खासदार म्हणून आधीच शपथ घेतलेल्या व्यक्तीकडून हलफनामा मागणे योग्य नसल्याचे ते म्हणाले. त्यांनी लोकशाहीवरील विश्वास अबाधित ठेवण्यासाठी पारदर्शक चौकशीची आवश्यकता अधोरेखित केली आणि सत्य जनतेसमोर येणे गरजेचे असल्याचे सांगितले. फडणवीस यांच्या वक्तव्याला उत्तर देताना त्यांनी स्पष्ट केले की, नाराजी ही आयोगाशी आहे, सरकारशी नाही, आणि चुकीची माहिती असल्यास आयोगानेच ती दुरुस्त करावी.