मान्सूनच्या विश्रांतीमुळे नागपूरकर हैराण; तापमानात झपाट्याने वाढ, उकाड्याचा कहर

 

 (Image Source-Internet)

शहरात मान्सूनची (Monsoon) गती पुन्हा मंदावल्याने उन्हाचा चटका आणि उकाडा प्रचंड वाढला आहे. गेल्या काही दिवसांत पावसाने पाठ फिरवली असून त्याचा परिणाम नागपूरच्या तापमानात थेट दिसून येतो आहे. सध्या शहराचं कमाल तापमान ३४ अंश सेल्सियसच्या वर गेले असून, किमान तापमानदेखील २५ अंशांपेक्षा अधिक आहे.

 

पावसाअभावी वातावरणात दमटपणा वाढला आहे. दिवसा कडक उन्हामुळे बाहेर पडणं अवघड बनलं असून, रात्रीही उकाडा कायम असल्याने झोपेवर परिणाम होतो आहे. नागरिकांना दिवसागणिक वाढत्या उष्णतेचा त्रास सहन करावा लागत आहे.

 

हवामान खात्याच्या माहितीनुसार, सध्या बंगालच्या उपसागरात कोणतीही प्रभावी प्रणाली सक्रिय नसल्यामुळे मान्सून कमकुवत झाला आहे. त्यामुळे पुढील काही दिवसांमध्ये जोरदार पावसाची शक्यता अत्यंत कमी आहे.

 

तथापि, जर नमीयुक्त वारे पुन्हा सक्रिय झाले, तर शहरात हलक्या सरींचा अनुभव येऊ शकतो, असा अंदाज हवामान विभागाने व्यक्त केला आहे. तोपर्यंत मात्र नागपूरकरांना उकाड्याच्या तीव्रतेशी सामना करावा लागणार आहे.