शिवसेनेचा बाप मीच;भाजप नेते परिणय फुके यांच्या वक्तव्याने वादंग,शिंदे गट आक्रमक

 

 (Image Source-Internet)

भंडारा येथे झालेल्या भाजप कार्यकर्ता मेळाव्यात भाजपचे ज्येष्ठ नेते आणि विधान परिषदेचे सदस्य परिणय फुके (Parinay Phuke) यांनी वादग्रस्त विधान करत संपूर्ण राज्याच्या राजकारणात खळबळ माजवली आहे. "शिवसेनेचा बाप मीच आहे," या शब्दांत फुके यांनी आपली भूमिका मांडताना विरोधकांवर टीका केली. मात्र त्यांच्या या विधानामुळे युतीतील सहयोगी असलेल्या शिवसेना शिंदे गटाच्या भावना दुखावल्या गेल्या असून, या वक्तव्यावरून राजकीय वातावरण तापले आहे.

 

परिणय फुके यांनी आपल्या भाषणात म्हटले की, "शिवसेनेचा बाप मीच आहे, कारण जे काही वाईट होतं, त्याचं खापर माझ्यावर फोडलं जातं. चांगलं झालं की आईने केलं म्हणतात, आणि वाईट झालं की बापावर टाकतात. तसंच काहीसं माझ्याबाबतीत सुरू आहे. त्यामुळे टीकांकडे दुर्लक्ष करून पक्ष बळकट करण्यावर आपलं लक्ष केंद्रित केलं पाहिजे." या वक्तव्यानंतर मेळाव्यात काही क्षणांसाठी हास्याची लाट उसळली, पण नंतर त्याचा राजकीय अर्थ लावण्यात आला आणि वादाला तोंड फुटले.

 

या वक्तव्यानंतर शिवसेना (शिंदे गट) आक्रमक झाला असून, मुंबईत आयोजित पत्रकार परिषदेत त्यांनी तीव्र शब्दांत निषेध नोंदवला. फुके यांनी तत्काळ माफी मागावी, अन्यथा "शिवसेना स्टाईलने उत्तर दिलं जाईल," असा थेट इशाराच देण्यात आला. हा मुद्दा गंभीर मानत शिंदे गटाने भाजपकडे खुली मागणी केली आहे की, अशा प्रकारची वक्तव्ये युतीच्या नीतीला धरून नाहीत.

 

दरम्यान, शिवसेनेचे प्रवक्ते आणि राज्य सरकारमधील मंत्री दीपक केसरकर यांनी संयम राखत प्रतिक्रिया दिली. त्यांनी स्पष्ट केलं की, फुके यांचे विधान हे त्यांच्या वैयक्तिक भावना आहेत आणि त्याला भाजप किंवा युती सरकारची अधिकृत भूमिका म्हणता येणार नाही. "आपण सध्या युती सरकारचा भाग आहोत आणि जनतेच्या हितासाठी एकत्र काम करत आहोत. त्यामुळे वाद वाढवण्याऐवजी कामावर लक्ष केंद्रित करूया," असे केसरकर यांनी म्हटले.

 

या संपूर्ण प्रकारामुळे भाजप आणि शिंदे गट यांच्यातील अंतर्गत मतभेद पुन्हा समोर आल्याची चर्चा राजकीय वर्तुळात सुरू झाली आहे. यापूर्वीही अनेकदा दोन्ही पक्षांमध्ये कुरबुरी झाल्याचे दिसून आले असून, फुके यांच्या विधानामुळे पुन्हा एकदा युतीतील 'मनोमिलन' कितपत आहे, यावर प्रश्नचिन्ह उभं राहिलं आहे.

 

राजकीय विश्लेषकांच्या मते, हे वक्तव्य फुके यांचं वैयक्तिक असलं, तरी त्याचे दूरगामी परिणाम होऊ शकतात. विशेषतः आगामी विधानसभा निवडणुकांच्या पार्श्वभूमीवर अशा विधानांमुळे युतीतील समन्वयाला तडा जाण्याची शक्यता नाकारता येत नाही.