महाराष्ट्रातील कर्मचाऱ्यांसाठी नवा बदल? खाजगी क्षेत्रात कामाचे तास ९ वरून १० करण्याचा प्रस्ताव

 

 (Image Source-Internet)

महाराष्ट्र (Maharashtra) सरकार खाजगी कंपन्यांमधील कामगारांसाठी महत्त्वाचा बदल करण्याच्या तयारीत आहे. राज्यात कामाचे तास सध्याच्या ९ तासांऐवजी १० तास करण्याचा विचार सुरु असून, ही माहिती कामगार मंत्री आकाश फुंडकर यांनी दिली आहे.

 

सरकारचे म्हणणे आहे की या बदलामुळे कामगार व्यवस्थेत अधिक लवचिकता येईल आणि महाराष्ट्राचे कामगार कायदे आंतरराष्ट्रीय निकषांशी जुळतील.

 

हा बदल "महाराष्ट्र दुकाने व आस्थापने (रोजगार व सेवा अटींचे नियमन) कायदा, २०१७" मध्ये सुधारणा करून करण्यात येणार आहे. या कायद्याद्वारे दुकाने, हॉटेल्स आणि इतर आस्थापनांतील कामगारांचे तास निश्चित केले जातात.

 

अद्याप मंत्रिमंडळाने अंतिम निर्णय घेतलेला नाही. सरकारने याबाबत अधिक माहिती व अभ्यास करण्यासाठी कामगार विभागाला निर्देश दिले आहेत.

 

महिलांना रात्री उशिरापर्यंत काम करण्याची परवानगी मिळू शकते.

आतापर्यंत फक्त १० कर्मचाऱ्यांपेक्षा जास्त असलेल्या कंपन्यांवर हा कायदा लागू होत होता; आता ही मर्यादा २० पर्यंत नेण्याची चर्चा आहे.

या निर्णयावर अंतिम शिक्कामोर्तब झाल्यास, खाजगी क्षेत्रातील लाखो कर्मचाऱ्यांच्या कामकाजाच्या वेळापत्रकात मोठा बदल होणार आहे.