नागपूर महापालिका निवडणूक 2025 : नवीन प्रभाग रचनेचा प्रारूप जाहीर
Total Views |
- नागरिकांना 28 ऑगस्टपर्यंत हरकती नोंदवता येणार
(Image Source-Internet) नागपूर :
नागपूर महानगरपालिका निवडणूक (NMC Elections) 2025 साठी नव्या प्रभाग रचनेचा प्रारूप जाहीर करण्यात आला आहे. 22 ऑगस्टच्या मध्यरात्री हा मसुदा प्रसिद्ध करण्यात आला. नव्या रचनेनुसार एकूण 38 प्रभाग निश्चित करण्यात आले आहेत. त्यापैकी 37 प्रभागांमध्ये प्रत्येकी चार वॉर्ड तर एका प्रभागात तीन वॉर्ड असतील. ही रचना 2017 मध्ये झालेल्या प्रभाग रचनेच्या धर्तीवर तयार करण्यात आली आहे.
या प्रारूपावर नागरिक, जनप्रतिनिधी आणि इच्छुक उमेदवार 28 ऑगस्टपर्यंत हरकती व सूचना सादर करू शकतात. त्यानंतर नगर विकास विभाग 8 सप्टेंबरपर्यंत या सर्व हरकतींचा विचार करून अंतिम मसुदा तयार करेल. हा अंतिम मसुदा 26 सप्टेंबरपर्यंत राज्य निवडणूक आयोगाकडे पाठवण्यात येणार आहे. आयोग 6 ऑक्टोबर रोजी अंतिम प्रभाग रचना जाहीर करेल.
नवीन रचनेत फारसे मोठे बदल करण्यात आले नाहीत. काही प्रभागांमध्ये किरकोळ फेरबदल झाले असून बहुतांश भागांचे स्वरूप पूर्वीप्रमाणेच आहे. यावेळी मतदारसंख्येत वाढ झाली आहे. प्रभाग 16 मध्ये सर्वाधिक तर प्रभाग 38 मध्ये सर्वात कमी मतदार आहेत.
