गणेशोत्सवाआधी अजित पवारांची मोठी घोषणा; पुणेकरांसाठी मेट्रो सेवा रात्री २ पर्यंत

 

 (Image Source-Internet)

राज्यात गणेशोत्सवाची उलटी गिनती सुरू झाली असून उत्सव काही दिवसांवर येऊन ठेपला आहे. अशा पार्श्वभूमीवर उपमुख्यमंत्री आणि पुण्याचे पालकमंत्री अजित पवार (Ajit Pawar) यांनी पुणेकरांना मोठ्या सुविधा जाहीर केल्या. पुण्यात पत्रकार परिषदेत ते बोलत होते.

 

अजित पवार यांनी सांगितले की, यंदाचा गणेशोत्सव राज्य महोत्सव म्हणून साजरा केला जाणार आहे. राज्यातील सर्व प्रशासकीय यंत्रणा मिळून हा उत्सव शांततेत आणि आनंदात पार पडावा यासाठी सज्ज राहतील.

 

उपमुख्यमंत्र्यांनी जाहीर केले की, गणेशोत्सव काळात पुणे मेट्रो सेवा सकाळी ६ पासून मध्यरात्रीनंतर रात्री २ वाजेपर्यंत सुरू राहील. विसर्जनाच्या दिवशी मात्र मेट्रो अख्खा दिवस अखंड धावणार आहे. तसेच मानाच्या गणपतींची मिरवणूक पाहण्यासाठी कोणत्या स्टेशनवरून प्रवास करावा याबाबत विशेष नियोजन करण्यात येणार आहे. गर्दी लक्षात घेता मेट्रोच्या फेऱ्याही वाढवल्या जातील.

 

काही मंडळांनी विसर्जन मिरवणुकीची सुरुवात सकाळी सात वाजता करण्याची मागणी केली आहे. यावर अजित पवार यांनी स्पष्ट केले की, मानाच्या गणपतींचा मान राखून आणि मंडळांच्या मागण्या लक्षात घेऊन सकारात्मक निर्णय घेण्यात येईल. ढोल-ताशांच्या पथकांचे वेळापत्रक, संख्या याबाबतही लवकरच तोडगा निघेल.

 

पत्रकार परिषदेत अजित पवार यांनी **‘पुणे ग्रँड चॅलेंज टूर’**ची माहिती दिली. यात दोन्ही महापालिका, जिल्हा परिषद आणि विविध शासकीय संस्था सहभागी होणार आहेत.

 

तसेच, पुरंदर विमानतळ प्रकल्पाबाबतही त्यांनी भूमिका स्पष्ट केली. सरकार हा प्रकल्प उभारण्यास कटिबद्ध असून १२८५ एकर जमिनीचे भूसंपादन सुरू असल्याचे त्यांनी सांगितले. काही गावांतून विरोध होत असला तरी चर्चेतून प्रश्न सोडवले जातील, असेही ते म्हणाले.