मुसळधार पावसाने राज्यात उधळला कहर; अजित पवारांचे वॉर रूममधून थेट नियंत्रण

 

 (Image Source-Internet)

मागील काही दिवसांपासून कोसळणाऱ्या मुसळधार पावसामुळे (Heavy rains) राज्यातील अनेक भाग जलमय झाले असून, ग्रामीण भागापासून शहरांपर्यंत हाहाकार माजला आहे. ठाणे, पालघर, रत्नागिरी आणि मुंबईत रेड अलर्ट घोषित करण्यात आला आहे, तर इतर जिल्ह्यांना ऑरेंज अलर्ट देण्यात आला आहे. नद्या धोक्याच्या पातळीवर आल्याने पूरस्थिती गंभीर झाली आहे.

 

या पार्श्वभूमीवर उपमुख्यमंत्री अजित पवार यांनी आपत्ती व्यवस्थापन कक्षातून थेट परिस्थितीवर लक्ष ठेवले आहे. हवामान खात्याचे अहवाल दर तीन तासांनी मिळत असून, प्रशासनाकडून तातडीने उपाययोजना सुरू आहेत. लाखो हेक्टर शेती पाण्याखाली गेली असून, अनेक घरं व जनावरे वाहून गेल्याच्या घटनाही समोर आल्या आहेत. शेतकऱ्यांचे पंचनामे त्वरित पूर्ण करून मदत पोहोचवली जाईल, असेही पवार यांनी स्पष्ट केले.

 

दरम्यान, अनेक धरणांतून पाणी सोडावे लागत असल्याने जलसंपदा विभागाला अतिरिक्त सतर्कतेचे आदेश देण्यात आले आहेत. प्रत्येक धरणावर वरिष्ठ अधिकाऱ्यांची नेमणूक करण्यात आली आहे. शेजारील राज्यांशी समन्वय ठेवून पूरस्थितीवर नियंत्रण ठेवण्याचे प्रयत्न सुरू आहेत.

 

मुख्यमंत्री एकनाथ शिंदे यांच्या अध्यक्षतेखाली सकाळी तातडीची बैठक घेण्यात येणार असून, त्यानंतर मंत्रिमंडळाची विशेष बैठक होणार आहे. राज्यातील सर्व जिल्ह्यांतील प्रशासन सतर्क मोडवर असून नागरिकांना सुरक्षित स्थळी हलवण्यासाठी युद्धपातळीवर प्रयत्न सुरू आहेत.

 

“कोणीही घाबरू नये, सरकार परिस्थितीवर बारीक लक्ष ठेवून आहे. अडचणीत असलेल्यांना मदत पोहोचवली जात आहे. नागरिकांनी अफवांवर विश्वास ठेवू नये आणि अत्यावश्यक असेल तेव्हाच घराबाहेर पडावे,” असे आवाहन अजित पवार यांनी केले.