नागपूरात ‘गरुड दृष्टि’ प्रकल्पाची मोठी कामगिरी; सायबर फसवणूकग्रस्तांना १० कोटींची परतफेड

(Image Source-Internet)  

सायबर गुन्ह्यांच्या बळी ठरलेल्या नागपूरकरांना मोठा दिलासा मिळाला आहे. नागपूर पोलिसांच्या पुढाकारातून मुख्यमंत्री देवेंद्र फडणवीस यांच्या हस्ते १० कोटी रुपयांची परतफेड करण्यात आली. या कार्यक्रमात सोशल मीडियावर लक्ष ठेवण्यासाठी राबविण्यात येणाऱ्या ‘गरुड दृष्टि’ (Garud Drishti) या अभिनव प्रकल्पाचे महत्त्व विशेषतः अधोरेखित करण्यात आले.

 

मुख्यमंत्री फडणवीस यांनी यावेळी नागरिकांना सावधानतेचा इशारा देत सांगितले, “या जगात काहीही मोफत नसते, त्यामुळे सोशल मीडियावरील आकर्षक ऑफर्स किंवा प्रलोभनांना बळी पडू नका.” त्यांनी ‘गरुड दृष्टि’ प्रकल्पाच्या यशाबद्दल समाधान व्यक्त करत, हा पायलट प्रकल्प आता राज्यातील इतर जिल्ह्यांतही विस्तारला जाणार असल्याची घोषणा केली.

 

‘गरुड दृष्टि’मुळे सायबर फसवणुकीची तात्काळ माहिती मिळवणे, अफवांवर नियंत्रण ठेवणे आणि सोशल मीडियाचा जबाबदारीने वापर सुनिश्चित करणे शक्य झाले आहे. या प्रकल्पाचे पेटंट गृहमंत्रालयाकडे असल्याची माहितीही यावेळी देण्यात आली.

 

सायबर गुन्ह्यांमध्ये ‘गोल्डन आवर’चे महत्त्व अधोरेखित करत, फडणवीस यांनी नागरिकांना विलंब न करता तक्रार नोंदवण्याचे आवाहन केले. तात्काळ कारवाईमुळे बँक खाते गोठवून फसवणूक रोखता येते, असे त्यांनी नमूद केले.

 

या उपक्रमामुळे सायबर फसवणुकीच्या घटनांमध्ये घट होण्याची शक्यता वर्तवली जात असून, लवकरच हा प्रकल्प संपूर्ण महाराष्ट्रात लागू होणार असल्याचे संकेत मुख्यमंत्री फडणवीस यांनी दिले.