नागपूरात पुन्हा दमदार पावसाची हजेरी; हवामान विभागाचा ऑरेंज अलर्ट

(Image Source-Internet)  

नागपूर (Nagpur) शहरात शनिवारी सकाळपासूनच पावसाने जोरदार हजेरी लावली असून, वातावरणात अचानक बदल जाणवू लागला आहे. काही दिवसांच्या विश्रांतीनंतर पावसाने पुन्हा एकदा जोर धरला आहे. हवामान विभागाने नागपूरसह विदर्भातील अनेक जिल्ह्यांसाठी ‘ऑरेंज अलर्ट’ जारी करत पुढील २४ ते ४८ तासांमध्ये मुसळधार पावसाची शक्यता वर्तवली आहे.

 

पहाटेपासून सुरू झालेल्या संततधार पावसामुळे शहरातील तापमानात घट झाली असून हवामान गारठवणारे झाले आहे. पावसामुळे नागरिकांना उकाड्यापासून दिलासा मिळाला आहे, तर दुसरीकडे काही भागांत पाणी साचल्याने वाहतुकीवर परिणाम झाला आहे.

 

ही पर्जन्यवृष्टी जोरदार वाऱ्यांसह होत असून त्यामुळे शहरातील काही रस्त्यांवर झाडांची पाने व फांद्या पडल्याचे पाहायला मिळाले. हवामान खात्याने नागरिकांना सतर्क राहण्याचे आवाहन केले आहे.

 

पावसाने शेतकऱ्यांच्या आशा पल्लवित केल्या असून उशिरा झालेल्या पेरण्या आता पूर्ण होण्याची शक्यता आहे. कृषी तज्ज्ञांच्या मते, हा पाऊस खरीप हंगामासाठी फायदेशीर ठरू शकतो.

 

सार्वजनिक ठिकाणी अनावश्यक प्रवास टाळावा, तसेच शक्यतो घरातच राहावे, असा सल्लाही प्रशासनाकडून देण्यात आला आहे.