मराठीसाठी शिवसेना-मनसेची एकजूट; भाजपवर सुषमा अंधारेंचा थेट हल्ला

 

 (Image Source-Internet)

मराठी भाषेच्या प्रश्नावर शिवसेना (उद्धव बाळासाहेब ठाकरे) आणि महाराष्ट्र नवनिर्माण सेनेनं (मनसे) पुन्हा एकदा एकत्र येण्याचा निर्णय घेतला आहे. येत्या काही दिवसांत मराठी अस्मितेसाठी दोन्ही पक्षांनी संयुक्त मोर्चा काढण्याची घोषणा केली आहे. या पार्श्वभूमीवर भाजपवर जोरदार टीकास्त्र सोडण्यात आलं आहे.

 

शिवसेनेकडून करण्यात आलेल्या आरोपानुसार, जेव्हा मुख्यमंत्री एकनाथ शिंदे आणि राज ठाकरे भेटतात तेव्हा भाजप गप्प राहतो, पण उद्धव ठाकरे आणि राज ठाकरे एकत्र आले की भाजपला त्यात राजकीय हेतू दिसू लागतात. "ही दुहेरी भूमिका लोकांना स्पष्ट दिसत आहे," असं शिवसेनेचं म्हणणं आहे.

 

शिवसेनेच्या नेत्या सुषमा अंधारे यांनीही भाजपवर थेट प्रश्नांची सरबत्ती केली. “जर भाजप खरंच मराठी भाषेसाठी बांधील असेल, तर आजपर्यंत त्यांनी अध्यादेश का काढला नाही? आम्ही दोन महिने थांबलो, पण फक्त आश्वासनं मिळाली,” असं म्हणत त्यांनी मुख्यमंत्री शिंदेंना खोटी माहिती दिल्याबद्दल नोटीसही बजावल्याची माहिती दिली.

 

हिंदी सक्तीच्या पार्श्वभूमीवर अजित पवार यांनी स्पष्ट भूमिका घेतली असताना मुख्यमंत्री मात्र गप्प आहेत, यावरही सुषमा अंधारे यांनी प्रश्नचिन्ह उपस्थित केलं आहे.

 

राज ठाकरे आणि संजय राऊत यांच्यातील संवादावर चर्चा रंगत असताना, तो पक्षीय नव्हे तर एक वैयक्तिक संवाद असल्याचं स्पष्टीकरण देण्यात आलं आहे. "ही एकजूट म्हणजे बाळासाहेब ठाकरे यांच्या स्वप्नाचं मूर्त स्वरूप आहे," असंही शिवसेनेकडून सांगण्यात आलं.

 

भाजपकडून अद्याप कोणतीही अधिकृत प्रतिक्रिया आली नसली, तरी शिवसेनेनं उपमुख्यमंत्री देवेंद्र फडणवीस यांच्यावर सूचक टोमणा मारत म्हटलं – “आज ते अस्वस्थ असतील; ताज हॉटेलमधील त्यांची बैठक राजकीय डावपेचाच भाग होती.”

 

"हा मोर्चा पक्षापेक्षा मोठा आहे. मराठीसाठी लढणाऱ्या प्रत्येकाने यात सहभागी व्हावं,असे आवाहन अंधारे यांनी केले.