‘बिग बॉस 19’ लवकरच सज्ज; प्रीमियर ३ ऑगस्टला? स्पर्धकांच्या नावांची जोरदार चर्चा

 

 (Image Source-Internet)

भारताच्या सर्वात लोकप्रिय रिअ‍ॅलिटी शोंपैकी एक असलेला ‘बिग बॉस’ (Bigg Boss) आता आपल्या 19व्या पर्वासाठी पुन्हा एकदा प्रेक्षकांच्या भेटीला येण्यास सज्ज झाला आहे. सलमान खानच्या करिष्म्याच्या साथीने या शोने अनेकदा टीआरपीच्या यादीत आघाडी घेतली आहे. यंदाचा हंगामही तितकाच रोचक ठरणार असल्याचं संकेत मिळत आहेत.

यंदाचा प्रीमियर मूळतः 19 जुलै रोजी होईल, अशी चर्चा होती. मात्र, आताच्या घडामोडींनुसार 3 ऑगस्ट ही शक्य तितकी अंतिम तारीख ठरली आहे. अद्याप निर्मात्यांकडून अधिकृत घोषणा करण्यात आलेली नसली, तरी आतापर्यंतच्या माहितीनुसार हीच तारीख निश्चित मानली जात आहे.

यंदाच्या पर्वात अनेक नवे ट्विस्ट्स प्रेक्षकांना अनुभवायला मिळणार आहेत. सर्वांत विशेष म्हणजे सलमान खानसाठी तयार करण्यात आलेली ‘सीक्रेट रूम’. या गुप्त खोलीत काही नॉमिनेटेड स्पर्धकांना काही काळासाठी ठेवण्यात येणार असून, त्यांना इतर स्पर्धकांचं वर्तन पाहण्याची संधी मिळणार आहे. यामुळे घरातील समीकरणं नव्या वळणावर जाण्याची शक्यता आहे.

एव्हिक्शन प्रक्रियेतही मोठा बदल करण्यात आला असून, यंदा प्रेक्षकांच्या थेट सर्वेक्षणावरून कोणते सदस्य बाहेर जाणार, हे ठरणार आहे. शिवाय, घरातील रोजच्या गरजा पूर्ण करण्यासाठी टास्क जिंकणं गरजेचं असणार आहे. त्यामुळे स्पर्धेतील थरार आणखी वाढणार आहे.

स्पर्धकांच्या नावांबाबत उत्सुकता उंचावली असून, आतापर्यंत ज्या नावांची चर्चा आहे त्यामध्ये डेझी शाह, तनुश्री दत्ता, फैजल शेख (फैजू), खुशी दुबे, विक्रम सिंह चौहान, राम कपूर, शशांक व्यास आणि लक्ष्य चौधरी यांचा समावेश आहे. ही यादी पाहता हंगाम अतिशय ग्लॅमरस आणि चुरशीचा ठरणार, असं म्हटलं जात आहे.

यंदा एक वेगळा ट्रेंड पाहायला मिळणार आहे – सोशल मीडियावरचे इन्फ्लुएंसर्स किंवा यूट्यूबर्स यावेळी सहभागी होणार नाहीत, असं म्हटलं जात आहे. त्यामुळे पारंपरिक कलाकारांनाच संधी मिळेल, असं दिसत आहे.

दरम्यान, ‘बिग बॉस OTT 4’ हा हंगाम प्रॉडक्शनच्या अडचणींमुळे रद्द करण्यात आला असून, आता सगळी टीम फक्त मुख्य टीव्ही शोवर लक्ष केंद्रित करत आहे. लवकरच या शोचा प्रोमो आणि अधिकृत घोषणा जाहीर होण्याची शक्यता आहे.