नागपूरमध्ये हवामानात बदल; काही भागांत पावसासह गारपीट, तर काही ठिकाणी उन्हाचीच तीव्रता कायम

 

 (Image Source : Internet)

शहरात शनिवारी दुपारनंतर अचानक हवामानात मोठा बदल दिसून आला. काही भागांमध्ये जोरदार वारे वाहू लागले, त्यानंतर पावसासह गारपीट झाली. अनेक भागांत मुसळधार पाऊस कोसळला, ज्यामुळे नागपूरकरांना तीव्र उन्हापासून काहीसा दिलासा मिळाला. मात्र दुसऱ्या काही भागांमध्ये सूर्यप्रकाश आणि उष्णतेने हैराण करणारा अनुभव कायम राहिला.

 

हवामान खात्याच्या माहितीनुसार, उत्तर भारतात सक्रिय असलेल्या पश्चिम विक्षोभामुळे हा हवामान बदल घडून आला आहे. नागपूरच्या काही भागांमध्ये पावसासोबतच ओलेही पडले आहेत. पार्किंगमध्ये उभ्या असलेल्या काही वाहनांवर याचा परिणाम दिसून आला.

 

तरीही, अनेक भागांमध्ये उष्ण आणि दमट हवामानामुळे नागरिकांना त्रास सहन करावा लागला. शहराचा कमाल तापमान सध्या ४१ अंश सेल्सियस इतकं आहे.

 

हवामान विभागाने पुढील काही तासांत पावसाची तीव्रता वाढण्याची शक्यता वर्तवली आहे. काही भागांमध्ये सौम्य गारपीट होण्याची शक्यता देखील आहे. तापमानात किंचित घट होण्याची शक्यता असूनही दमट हवामानामुळे उष्णतेचा परिणाम अद्याप कायम राहणार आहे.

 

या वातावरणीय बदलानंतरही शहरात गार वाऱ्यांचा अभाव जाणवतो आहे, ज्यामुळे उष्म्याची तीव्रता कमी होताना दिसत नाही. हवामान विभागाने पुढील दोन दिवस हवामानात चढ-उतार होण्याची शक्यता दर्शवली आहे.