रामटेक गड मंदिर रोपवे: बांधकामासह देखभालीसाठी 151.50 कोटी मंजूर; केंद्रीय मंत्री गडकरींची माहिती

 

 (Image Source : Internet)

रामटेक गड मंदिरात (Ramtek Gad Temple) भाविकांसाठी रोपवे बांधण्याची योजना आहे. राष्ट्रीय महामार्ग विकास प्राधिकरण (NHAI) तर्फे या रोपवेचे बांधकाम करण्यात येणार आहे. या प्रकल्पासाठी 151.50 कोटी रुपयांची मंजुरी देण्यात आली आहे.

 

रामटेक गड मंदिर हे भारतातील आणि जगभरातील रामभक्तांसाठी अत्यंत महत्त्वाचे धार्मिक स्थळ मानले जाते. दरवर्षी लाखो भाविक भगवान श्रीराम आणि माता जानकीच्या दर्शनासाठी येथे येतात. भाविकांना अधिक सुविधा मिळाव्यात म्हणून केंद्रीय मंत्री नितीन गडकरी यांनी आठ महिन्यांपूर्वी या रोपवेच्या उभारणीची घोषणा केली होती. आता 665 मीटर लांब या रोपवेच्या बांधकामास मान्यता मिळाली आहे.

 

केंद्रीय मंत्री नितीन गडकरी यांनी माहिती देताना सांगितले की, रामटेक हे महाराष्ट्रातील एक प्रमुख तीर्थक्षेत्र आहे, जिथे भगवान श्रीराम यांनी वनवासाच्या काळात काही काळ वास्तव्य केले होते. दरवर्षी सुमारे 8 लाख भाविक रामटेक गड मंदिराच्या दर्शनासाठी येतात आणि दोन वेगवेगळ्या मार्गांनी मंदिरापर्यंत पोहोचतात.

 

ते पुढे म्हणाले की, या रोपवे प्रकल्पात मोनोकेबल फिक्स्ड ग्रिप जिग बॅक तंत्रज्ञानाचा वापर केला जाणार आहे, ज्यामुळे दररोज 7,200 यात्रेकरूंना सेवा पुरवता येईल. हा रोपवे 3-4 मिनिटांत मंदिरात पोहोचण्यास मदत करेल. तसेच या प्रकल्पामुळे या भागातील आर्थिक आणि पर्यटन विकासालाही मोठी चालना मिळेल.