पुण्यात चंदनगरमध्ये भीषण आग, ९० कुटुंबांचे संसार उद्धवस्त

 

 (Image Source : Internet)

पुण्यातील चंदनगर (Chandanagar) येथील झोपडपट्टीत बुधवारी (दि. २३) पहाटे लागलेल्या भीषण आगीत ९० हून अधिक कुटुंबांचे संसार पूर्णपणे उद्धवस्त झाले आहेत. या आगीत शेकडो नागरिक उघड्यावर आले असून, स्थानिक प्रशासनाने मदतीची तातडीने कारवाई सुरू केली आहे.

 

चंदनगरच्या सुंदराबाई मराठे शाळेच्या नजिक असलेल्या डॉ. बाबासाहेब आंबेडकर वस्तीमध्ये लागलेल्या आगीने संपूर्ण वस्तीला वेढले. सुमारे ९० झोपड्या आगीच्या भक्ष्यस्थानी पडल्या. या आगीत घरांची सामग्री जळून राख झाली आहे आणि लोकांना उघड्यावर आपला संसार सोडावा लागला आहे.

 

या घटनेवर महाराष्ट्र विधान परिषदेच्या उपसभापती डॉ. नीलम गोऱ्हे यांनी तत्काळ प्रतिक्रिया दिली आहे. त्यांनी मुख्यमंत्री देवेंद्र फडणवीस, उपमुख्यमंत्री एकनाथ शिंदे, पालकमंत्री अजित पवार आणि पुणे जिल्हाधिकारी यांना तातडीने मदतीची आणि पुनर्वसनाची मागणी केली आहे.आगीत शेकडो कुटुंबांचे संसार उधळले गेले आहेत. त्यांना तात्काळ पुनर्वसनाची आवश्यकता आहे. प्रशासनाने या घटनेची त्वरित दखल घेऊन सर्व मदत उपलब्ध करून द्यावी, असे डॉ. गोऱ्हे यांनी सांगितले.

 

डॉ. गोऱ्हे यांनी प्रशासनाला नुकसानग्रस्तांना तात्पुरते निवारे, अन्न आणि पाणी पुरवठ्याची व्यवस्था करण्याची मागणी केली आहे. त्याचप्रमाणे, दीर्घकालीन पुनर्वसनाची योजना राबविणे, तसेच भविष्यात अशा दुर्घटनांची पुनरावृत्ती टाळण्यासाठी सुरक्षा उपाययोजना करणे आवश्यक आहे, असे त्यांनी स्पष्ट केले.

 

डॉ. गोऱ्हे यांनी अशा घटनांची पुनरावृत्ती टाळण्यासाठी झोपडपट्टीतील वीज आणि गॅस सेवा यांमध्ये सुधारणा आणि अग्निसुरक्षा उपाययोजना राबविण्याची आवश्यकता व्यक्त केली. शासनाने नागरिकांच्या सुरक्षा सुनिश्चित करावी आणि अशा दुर्घटनांच्या बाबतीत योग्य पावले उचलावीत,असे त्यांनी नमूद केले.