भारतीय क्रिकेट संघाचे प्रशिक्षक गौतम गंभीरला दहशतवादी संघटनेकडून जीवे मारण्याची धमकी

 

 (Image Source : Internet)

भारतीय क्रिकेट संघाचे मुख्य प्रशिक्षक गौतम गंभीर (Gautam Gambhir) याला ‘ISIS कश्मीर’ या दहशतवादी संघटनेने थेट जीवे मारण्याची धमकी दिली असून, यामुळे संपूर्ण क्रिकेटविश्वात चिंतेचं वातावरण पसरलं आहे. काश्मीरमधील पहलगाम येथे नुकत्याच घडलेल्या दहशतवादी हल्ल्यानंतर दुसऱ्याच दिवशी ही धमकी मिळाल्याचं समोर आलं आहे.

 

गंभीरने दिल्लीत पोलीस ठाण्यात या धमकीसंदर्भात तक्रार दाखल केली असून, आपल्या आणि आपल्या कुटुंबाच्या सुरक्षेची मागणी केली आहे. दिल्ली पोलिसांनी गंभीर दखल घेत तपास सुरू केला आहे.

 

सध्या गौतम गंभीर आयपीएलच्या ब्रेकवर असून, काही दिवसांपूर्वीच युरोप दौऱ्यावर गेला होता. मात्र या धमकीनंतर त्याने तत्काळ भारतात परत येत दिल्ली पोलिसांकडे एफआयआर दाखल केला. आगामी इंग्लंड दौऱ्यासाठी भारतीय संघ सज्ज होत असताना, ही घटना संघाच्या तयारीवर परिणाम करू शकते.

 

भारताचा प्रशिक्षक म्हणून गंभीर याची कारकीर्द आतापर्यंत यशस्वी ठरली आहे. त्याच्या मार्गदर्शनाखाली भारतीय संघाने आयसीसी चॅम्पियन्स ट्रॉफी जिंकली असून, सध्या तो 2027 वर्ल्ड कपपर्यंत प्रशिक्षकपदावर राहणार आहे. मात्र, नुकत्याच झालेल्या जागतिक कसोटी अजिंक्यपद (WTC) अंतिम सामन्यात भारताला अपयश आले. आता इंग्लंड दौऱ्यात ५ कसोटी सामन्यांची मालिका खेळवली जाणार आहे, जिथे गंभीर आणि संघ दोघांनाही मोठ्या अपेक्षांचं ओझं पेलावं लागणार आहे.गंभीरला मिळालेल्या धमकीमुळे केवळ क्रीडा विश्वातच नव्हे, तर राष्ट्रीय सुरक्षेच्या पातळीवरही प्रश्न उपस्थित झाले आहेत.