नागपूर खंडपीठाला बॉम्बची धमकी; ३० दिवसांत दुसऱ्यांदा खळबळजनक प्रकार

 

 (Image Source : Internet)

मंगळवार, २२ एप्रिल रोजी नागपूरमधील मुंबई उच्च न्यायालयाच्या खंडपीठात बॉम्ब ठेवण्यात आल्याची अज्ञात धमकी मिळाल्याने एकच खळबळ उडाली. सुरक्षा यंत्रणा तात्काळ सक्रिय झाल्या आणि संपूर्ण परिसरात कसून तपास सुरू करण्यात आला.

 

ही घटना गेल्या महिन्याभरातील दुसरी अशी घटना असून, याआधी २४ मार्च २०२५ रोजी अशाच स्वरूपाची धमकी मिळाली होती, जी नंतर खोटी असल्याचे निष्पन्न झाले. त्या प्रकरणात जरीपटका भागातील एका व्यक्तीने सदर पोलिस ठाण्यात माहिती दिल्याने त्याला ताब्यात घेतले गेले होते.

 

धमकी मिळताच पोलिसांनी तत्काळ घटनास्थळी धाव घेतली. वरिष्ठ पोलिस अधिकारी आणि बॉम्ब शोध व निकामी पथक (BDDS) घटनास्थळी दाखल झाले आणि न्यायालय परिसरात सखोल तपासणी सुरू केली.

 

दरम्यान, गुवाहाटी उच्च न्यायालयालाही याच दिवशी ई-मेलद्वारे बॉम्बची धमकी मिळाली, ज्यामुळे एकाच वेळी विविध न्यायालयांना अशा धमक्यांचा सामना करावा लागत असल्याची शक्यता वर्तवली जात आहे.

 

नागपूर खंडपीठात एक संशयास्पद पिशवी आढळून आली असून, त्यात मोबाईल फोन आढळला आहे. पोलिसांकडून तपास सुरू असून, धमकीच्या स्त्रोताचा शोध घेण्याचे काम प्रगतीपथावर आहे.