नागपुरात किरकोळ वादातून कुख्यात गुंडाची हत्या

 

 (Image Source : Internet/ Representative)

शहरातील सक्करदरा पोलीस स्टेशन परिसरातील सोमवारी क्वार्टर कॉम्प्लेक्समधील शाहू गार्डनजवळ किरकोळ वादातून एका तरुणाची हत्या करण्यात आली.ही घटना वर्चस्वाच्या लढाईशी संबंधित असल्याचे म्हटले जाते.

 

सक्करदरा पोलिस ठाण्याच्या सोमवारी क्वार्टर्स कॉम्प्लेक्समध्ये असलेल्या शाहू गार्डनजवळ काल रात्री ही हत्या घडली. मृत व्यक्तीचे नाव २८ वर्षीय कार्तिक चौबे असल्याचे सांगण्यात येत आहे. मिळालेल्या माहितीनुसार, काल रात्री कार्तिक चौबे त्याचा मित्र रोशन गायकवाड आणि इतर दोन मित्रांसह दारू पिण्यासाठी त्यांच्या घराजवळ रस्त्याच्या कडेला बसला होता.

 

यादरम्यान त्यांच्यात वाद झाला. ज्यामध्ये कार्तिकने बिअरची बाटली फोडून रोशनवर हल्ला करण्याचा प्रयत्न केला. या हल्ल्यानंतर रोशनने त्याच्याकडे असलेल्या चाकूने कार्तिकच्या छातीवर सपासप वार केले. तर त्याच्या इतर दोन साथीदारांनीही कार्तिकला मारहाण केली. या हत्येच्या घटनेनंतर तिन्ही आरोपी घटनास्थळावरून पळून गेले.

 

कार्तिक चौबेवर खुनाचा प्रयत्न, चोरी, हल्ला इत्यादी अनेक गुन्हे दाखल आहेत आणि काही दिवसांपूर्वीच तो तुरुंगातून सुटला असल्याचे सांगण्यात येत आहे. तर आरोपी रोशन गायकवाड आणि त्याच्या इतर साथीदारांवरही अनेकगुन्हे दाखल आहेत. वर्चस्वासाठी झालेल्या संघर्षातून ही हत्या झाल्याची चर्चा आहे, ज्याचा तपास पोलिस करत आहेत. पोलिसांनी हत्येचा गुन्हा दाखल केला असून पुढील तपास सुरु केला आहे.