इंडिगोची देशभरात सेवा विस्कळीत; कंपनीची माफी, प्रवाशांना दिलासा देणारी घोषणा

 

देशातील प्रमुख विमानकंपनी इंडिगोच्या सेवेत गेले काही दिवस गंभीर अडथळे निर्माण झाले असून, मोठ्या प्रमाणात उड्डाणे उशीराने धावत आहेत किंवा थेट रद्द केली जात आहेत. या गोंधळामुळे हजारो प्रवाशांचे नियोजन कोलमडले असताना इंडिगोने अधिकृत निवेदन जारी करून सार्वजनिकरित्या माफी मागितली आहे.

 

कंपनीने म्हटले आहे की, “प्रवाशांना होत असलेली गैरसोय आमच्या लक्षात आहे आणि त्याबद्दल आम्ही मनापासून दिलगिरी व्यक्त करतो. सेवा सुरळीत करण्यासाठी आमची यंत्रणा तत्परतेने काम करत आहे.”

 

दरम्यान, प्रवासावर परिणाम झालेल्या प्रवाशांसाठी कंपनीने काही तातडीच्या सवलती जाहीर केल्या आहेत. उड्डाण रद्द झालेल्या ग्राहकांना परतावा थेट त्यांच्या मूळ बुकिंगच्या माध्यमातून मिळणार आहे. तसेच काही दिवसांसाठी तिकीट रद्द करणे किंवा पुनर्निर्धारित करणे या प्रक्रियेत कोणतेही अतिरिक्त शुल्क आकारले जाणार नाही, असा निर्णय घेण्यात आला आहे.

 

विमानतळांवरील वाढती गर्दी आणि ताण कमी करण्याच्या दृष्टीने नागरी उड्डाण खात्याच्या मार्गदर्शनानुसार काही उड्डाणे अल्पकालीन स्वरूपात स्थगित करण्यात आली आहेत. कंपनीने प्रवाशांना आवाहन केले की, ज्यांचे उड्डाण रद्द झाल्याची माहिती देण्यात आली आहे, त्यांनी अनावश्यकपणे विमानतळावर जाणे टाळावे.

 

एअरलाईनचे कॉल सेंटर ताणाखाली असले तरी, प्रवाशांना जलद प्रतिसाद देण्यासाठी अतिरिक्त कर्मचारी तैनात करण्यात आले आहेत. तिकीट बदलणे, रद्द करणे आणि परतावा यांसाठी इंडिगोचा डिजिटल असिस्टंटदेखील कार्यरत ठेवण्यात आला आहे.

 

इंडिगोने स्पष्ट केले की, ही स्थिती तात्पुरती असून सेवा लवकरच पूर्ण क्षमतेने सुरू करण्यासाठी कंपनीकडून सर्वतोपरी प्रयत्न केले जात आहेत.