नागपुरात भीषण अपघात; ट्रकच्या जोरदार धडकेत दोन चिमुकल्यांचा मृत्यू, काका गंभीर जखमी

 

 Image Source:(Internet)

शहरातील रिझर्व्ह बँक चौकात बुधवारी रात्री झालेल्या गंभीर अपघातात (Accident) दोन भावंडांचा करुण अंत झाला असून त्यांच्या काक्यांची प्रकृती अत्यंत नाजूक आहे. नातेवाईकांच्या लग्नसमारंभातून परत येत असताना वेगात आलेल्या ट्रकने दुचाकीला दिलेल्या धडकेत हा हृदयद्रावक प्रकार घडला.

 

मृतांमध्ये रुद्र सुनील सिंगलधुपे (११) आणि सिमरन सुनील सिंगलधुपे (१२) या दोन अल्पवयीन भावंडांचा समावेश आहे. रुद्र, सिमरन आणि त्यांचे काका जागेश्वरसिंग हे तिघे घरी परतत होते. चौकात पोहोचताच ट्रकने अचानक वेग वाढवत थेट दुचाकीवर जोरदार आघात केला.

 

अपघातानंतर मुले दूर फेकली गेली. रुद्रचा जागेवरच मृत्यू झाला, तर सिमरनला तातडीने रुग्णालयात नेण्यात आले. मात्र तीव्र दुखापतीमुळे उपचार सुरू असतानाच तिचा मृत्यू झाला. काका जागेश्वरसिंग गंभीर जखमी असून त्यांना अतिदक्षता विभागात प्राणपणाने उपचार सुरू आहेत.

 

या घटनेनंतर परिसरात संताप उसळला. रिझर्व्ह बँक चौकात अवजड वाहनांची अनियंत्रित वाहतूक, सिग्नल तोडण्याच्या घटना आणि बेफिकीर वेगाने जाणाऱ्या वाहनांमुळे नागरिक त्रस्त आहेत. रात्रीच्या वेळी नियमभंगाचे प्रमाण अधिक असल्याची तक्रार नागरिकांनी व्यक्त केली.

 

स्थानिकांनी कठोर वाहतूक नियंत्रण, अवजड वाहनांना निर्बंध, तसेच निष्काळजी चालकांवर कठोर कारवाईची मागणी केली आहे. दरम्यान, सदर पोलिसांनी आरोपी ट्रकचालकाचा शोध सुरू केला असून प्रकरणाचा तपास गतीने सुरू आहे.