‘अवतार ३’मध्ये गोविंदाची एन्ट्री? व्हायरल व्हिडीओमागचे खरे वास्तव काय

 

हॉलिवूड दिग्दर्शक जेम्स कॅमरूनच्या ‘अवतार’ फ्रँचायझीबाबत बॉलिवूड अभिनेता गोविंदाने (Govinda) याआधी केलेला एक दावा पुन्हा एकदा चर्चेत आला आहे. ‘अवतार’ चित्रपटासाठी आपल्यालाच सर्वप्रथम विचारणा करण्यात आली होती, मात्र आपण ही ऑफर नाकारली, असे गोविंदाने एका मुलाखतीत सांगितले होते. या वक्तव्यामुळे त्याला सोशल मीडियावर मोठ्या प्रमाणात ट्रोलिंगला सामोरे जावे लागले होते. इतकेच नव्हे तर त्याची पत्नी सुनीता आहुजानेही या दाव्यावर उपरोधिक प्रतिक्रिया देत, गोविंदाला ही ऑफर नेमकी कधी मिळाली होती, याची आपल्याला माहिती नसल्याचे म्हटले होते.

 

आता ‘अवतार ३’च्या प्रदर्शनानंतर पुन्हा एकदा गोविंदा चर्चेच्या केंद्रस्थानी आला आहे. सोशल मीडियावर व्हायरल होत असलेल्या काही फोटो आणि व्हिडीओंमुळे गोविंदा या चित्रपटात पाहुण्या कलाकाराच्या भूमिकेत दिसल्याचा दावा केला जात आहे. त्यामुळे चाहत्यांमध्ये उत्सुकता आणि संभ्रमाचे वातावरण निर्माण झाले आहे.

 

मात्र या व्हायरल दाव्यांचे वास्तव वेगळेच आहे. ‘अवतार: फायर अँड अॅश’च्या रिलीजनंतर समोर आलेले हे फोटो आणि व्हिडीओ पूर्णपणे बनावट असल्याचे स्पष्ट झाले आहे. हे सर्व कंटेंट एआय (कृत्रिम बुद्धिमत्ता) तंत्रज्ञानाच्या मदतीने तयार करण्यात आले आहेत. वास्तवाशी त्यांचा कोणताही संबंध नाही.

 

व्हायरल व्हिडीओंमध्ये गोविंदाला ‘अवतार’मधील नावी पात्राप्रमाणे निळ्या त्वचेत दाखवण्यात आले आहे. काही क्लिप्समध्ये तो त्याच्या खास स्टाइलमध्ये संवाद बोलताना दिसतो, तर काही फोटोमध्ये जेक सुलीसोबत एकाच फ्रेममध्ये असल्याचा भास निर्माण केला आहे. हे दृश्य इतके वास्तवदर्शी आहेत की अनेक प्रेक्षकांना गोविंदा खरोखरच सिनेमात असल्याचा गैरसमज झाला.

 

थोडक्यात सांगायचे तर, सोशल मीडियावर व्हायरल होणारे गोविंदाचे ‘अवतार ३’मधील फोटो आणि व्हिडीओ खरे नसून एआयद्वारे तयार करण्यात आलेले आहेत. गोविंदाची या चित्रपटात कोणतीही भूमिका नाही. त्यामुळे चाहत्यांनी अशा व्हायरल दाव्यांवर विश्वास ठेवण्याआधी त्याची सत्यता तपासणे गरजेचे आहे.