हाँगकाँगमध्ये भीषण आग; 44 जणांचा मृत्यू, शेकडो जखमी

 

 Image Source:(Internet)

 

हाँगकाँगच्या (Hong Kong) ताई पो परिसरातील ‘वांग फुक कोर्ट’ या मोठ्या निवासी संकुलात गुरुवारी दुपारी लागलेल्या भयानक आगीत संपूर्ण परिसर हादरला. आगीने अल्पावधीतच प्रचंड उग्र रूप धारण केले आणि त्या काळ्या धुराने आसपासचा भाग गुदमरून टाकला. या भीषण दुर्घटनेत 44 जणांचा मृत्यू झाल्याची अधिकृत माहिती समोर आली आहे, तर 45 हून अधिक लोक गंभीर जखमी आहेत. याशिवाय 279 रहिवासी बेपत्ता असून त्यांचा शोध सुरू आहे. जवळपास 4,600 नागरिक या आगकांडामुळे संकटात सापडले आहेत.

आग अचानक भडकताच रहिवाशांमध्ये एकच गोंधळ उडाला. अनेक जण धावपळीत घर सोडताना दिसले, तर काहींनी धूर वाढण्यापूर्वीच आपापल्या वस्तू गोळा करून बाहेर पडण्याचा प्रयत्न केला. काही मिनिटांत संपूर्ण परिसर घनदाट धुराने व्यापला आणि हवा गुदमरू लागली.

अधिकाऱ्यांनी दिलेल्या माहितीनुसार, दुपारी 2.51 वाजता इमारतींपैकी एका ब्लॉकमध्ये आग लागल्याचे आढळले. आठ टॉवर आणि दोन हजारांहून अधिक फ्लॅट्स असलेल्या या संकुलात आग काही क्षणांतच इतर भागात पसरली. इमारतीत सुरू असलेल्या दुरुस्तीच्या कामादरम्यान ठेवण्यात आलेल्या पॉलीस्टायरीनच्या शीट्स आणि बाहेरील बांबूच्या परांच्या संरचनेमुळे आग अधिक वेगाने पसरल्याचा अंदाज व्यक्त केला जात आहे.

या घटनेला गंभीर स्वरूप आल्याने पोलिसांनी मनुष्यवधाचा संशय घेत तीन जणांना अटक केली आहे. त्यात बांधकाम कंपनीचे दोन संचालक आणि एक अभियांत्रिकी सल्लागार यांचा समावेश आहे. नूतनीकरणाच्या प्रक्रियेत दुर्लक्ष झाल्यामुळे ही दुर्घटना वाढीस लागल्याचा ठपका त्यांच्यावर ठेवण्यात आला आहे.

आज सकाळीही काही ब्लॉक्समधून धूर निघत असल्याचे दिसून आले. मात्र आठपैकी चार इमारतींमधील आग नियंत्रणात आल्याचे अग्निशमन दलाने सांगितले. आग पूर्णपणे विझवण्यासाठी संपूर्ण दिवस लागू शकतो, असेही त्यांनी स्पष्ट केले. ताई पो रेल्वे स्थानकाच्या आसपास धुराचा तीव्र वास पसरल्याने ये-जा करणाऱ्या नागरिकांनाही त्रास होत आहे.

ही घटना हाँगकाँगच्या दाटीवाटीच्या वसाहतींचे गंभीर वास्तव पुन्हा एकदा अधोरेखित करते. इमारतींमधील कमी अंतर आणि लहान राहण्याच्या जागेमुळे आगीसारख्या आपत्ती काही क्षणांतच मोठ्या स्वरूपात बदलू शकतात, असा तज्ज्ञांचा इशारा आहे.

हजारो नागरिकांना तात्पुरत्या निवास केंद्रात हलवण्यात आले असून, आवश्यकतेनुसार आणखी आपत्कालीन निवास व्यवस्था उपलब्ध करून देण्यात येत आहे. 17 वर्षांनंतर हाँगकाँगमध्ये इतक्या मोठ्या प्रमाणावर आग लागल्याची ही पहिलीच वेळ असल्याचे स्थानिक अधिकारी सांगत आहेत.