नागपूरच्या नारा परिसरात मित्राकडून कुख्यात गुंडाचा खून, आरोपी फरार

 

 Image Source:(Internet)

नारा भागात बुधवारी पहाटे घडलेल्या एका धक्कादायक घटनेने नागपूर (Nagpur) हादरले आहे. स्थानिक गुन्हेगारी जगतातील ओळख असलेल्या बाबू चत्री या कुख्यात गुंडाचा त्याच्याच मित्राने खून केल्याचे उघड झाले आहे. संशयित मित्राचे नाव शाहू असे असून, घटनेनंतर तो फरार झाला आहे.

 

पोलिस सूत्रांकडून मिळालेल्या माहितीनुसार, मध्यरात्रीनंतर बाबू चत्री आणि शाहू यांच्यात काही कारणावरून तीव्र वाद झाला. हा वाद इतका वाढला की रागाच्या भरात शाहूने बाबूवर प्राणघातक हल्ला केला. गंभीर जखमी झालेल्या बाबूचा घटनास्थळीच मृत्यू झाला.

 

खूनाची माहिती मिळताच जरीपटका पोलिस घटनास्थळी दाखल झाले. त्यांनी पंचनामा करून मृतदेहाला उत्तरीय तपासणीसाठी शासकीय रुग्णालयात हलवले. वरिष्ठ पोलिस अधिकारी देखील घटनास्थळी पोहोचले असून, सखोल तपास सुरू करण्यात आला आहे.

 

दरम्यान, पोलिसांनी आरोपी शाहूच्या शोधासाठी विशेष पथके तयार केली आहेत. परिसरातील सीसीटीव्ही फुटेज आणि मोबाईल लोकेशनच्या आधारे तपास जलदगतीने सुरू आहे. खुनामागील नेमके कारण अजून स्पष्ट झाले नसून, पोलिसांनी विविध कोनातून तपास सुरू ठेवला आहे.

 

बाबू चत्रीवर पूर्वीही अनेक गुन्हे नोंदवले गेले होते. त्यामुळे हा खून जुन्या वैमनस्यातून झाला की वैयक्तिक वादातून, याचा शोध पोलिस घेत आहेत.